fbpx
主頁, 專題熱話, 潮玩新聞 — 15/10/2012 at 12:50 am

秋葉原新服務 美女廚房同你煮飯仔

by

嘩正呀,打機打到餓,有咩好得過整個印尼撈麵打孖上,食到悶咩?叮個波仔飯睇埋套金魂,再唔係辛苦啲落去買個8號餐上嚟嘆住,如果嗰日心情好,我仲會行遠啲去買KFC,煮多個罐頭湯或者叮個碗仔翅,一生一大享受……可能啲靚女佢哋唔忍心我哋食咁多劣食,所以喺日本秋葉原,新搞咗一門生意,係「男性向」料理教室……有著制服(絕對領域全開!)嘅女導師教你整幾味!

呢間叫料理教室「きっちんあらも~ど」(kitchen-a-la-mode),目標客戶主打宅男,個經理接受日本網站訪問時講:「我都係otaku,但係我鍾意煮嘢食。不過,唔係個個好似我咁,有好多宅男都唔識煮幾味,所以就要出去食飯或者煮即食食物啦。所以,我哋就開咗呢間料理教室,希望佢哋可以識煮嘢,健康啲又慳番出街食飯嘅時間,睇多兩套動畫打多兩舖機好過啦!」

 

睇相重點係著晒制服教你煮嘢嘅靚女,先係幫你著圍裙,而教你煮嘅嘢都不外乎成日喺Maid Cafe食到嘅嘢,好似蛋包飯咁,仲同你一齊喺個飯上面用茄汁唧個心形……嗚!太幸福喇!平日只需要7,800日元就可以上90分鐘堂,學整三味,假日都係9,800日元咋,女導師一對一!至於整好啲嘢食點搞?梗係自己食埋啦,不過,你睇吓啲坐位就知,係,係你自己一個食,唔包嘅,冇人陪。

不過,心水清嘅朋友都可能留意到一點,就係隨咗套制服同對腳外,導師嘅樣係遮咗嘅……點解呢?大家不妨諗諗點解,我估就係因為你嚟學煮嘢之嘛,導師個樣唔重要o格,一定係咁。

最後,我哋不如一齊許願,希望香港快啲搞番間咁嘅嘢啦!我想同女導師齊齊整豆腐火腩飯!Yeah!

 

官方網站
http://kitchen-a-la-mode.com/

資料來源
http://blog.livedoor.jp/geek/archives/51364414.html