fbpx
主頁, 動漫資訊, 潮玩新聞 — 12/10/2012 at 2:00 pm

獨一無二《第八銅人》立體膠畫板曝光!

by

《第八銅人》立體膠畫板,非賣品。

未去過「收藏家港漫專區Showroom」朝聖,唔好話自己係港漫迷,拿,Showroom開喺信和中心,交通咁方便無藉口唔去啦,仲要免入場費,一毫子都唔收你,今個禮拜行經MK,仲唔仆上去睇睇有乜好料?

Showroom面積唔大,頂盡擺得落二三十人,角落位有個小貨倉,其他地方包括座地飾櫃、玻璃箱櫃、牆壁甚至地下,可以用嘅都用到盡,全部擺滿各大小港漫精品,堪稱麻雀雖小,五臟俱全。有乜值得睇呢?多囉,〈福龍周記〉同《鐵將縱橫》原稿你睇過未?年紀分分鐘大過你嘅原版《財叔正傳》、《小流氓》同《龍虎門》漫畫,家陣有錢都未必買得到,仲有嗰副《龍虎門》砌圖,見到嗰刻,我真係心郁郁有啲衝動,想即刻科水買返屋企,砌就肯定唔砌架嘞,買黎收藏過吓癮都夠好啦。

擺喺飾櫃嗰幾塊《第八銅人》、《神兵玄奇》立體膠畫板,就簡直係精品中的精品,全部都係獨一無二嘅非賣品,有錢都買唔到,負責人Dicky話:「之前福龍自己整黎玩吓架咋,佢都無諗過會拎出黎賣,我見咁靚仔,收收埋埋盞嘥,咪拎出黎公諸同好囉。」Dicky呢個鬍鬚佬,為人非常友善,經常四萬咁口,你問乜佢答乜,仲唔介意人周圍影相,「牆上面把神兵,可以拎上手舞吓喎,過癮呢?墜手呢?」都啱嘅,有好嘢應該大家一齊分享吖嘛。

空手而回好無癮?放心,Showroom都有寄賣部份舊限量精品,舊《龍虎門》閃卡、《天下》聶風手辦公仔等等全部標明實價,畀錢,即刻可以拎佢哋返屋企,其他無標價嘅精品,都可以同Dicky認真Deal一Deal,開天殺價分分鐘可以落地還錢。仲有呀,凡購物滿港幣二十大元,即送「鐵將縱橫信心寶證2013至塑年曆紀念卡」特別版,話明係特別版,市面一張都無架,又係嗰句,有買趁手,送完即止。

收藏家港漫專區Showroom(6331 7833) 地址:旺角信和中心8樓801室

 

《神兵玄奇》立體膠畫板,非賣品。

王小龍「易經降龍」手辦,非賣品。

神兵,非賣品。

各主筆親筆畫板,又係有錢都買唔到。

呢幾本漫畫,分分鐘老過我同你。

《財叔正傳》,Sorry,我年紀尚小,真係未睇過。

呢幅福龍隨筆畫,又係正到無倫啫。

王小虎同王小龍手辦,好型仔。

就係呢副《龍虎門》砌圖,我心郁郁勁想買。

《龍虎門》閃卡,每盒$20。

福龍將自己嘅原稿,變成大小不一嘅膠畫板,非賣品。

《鐵將縱橫》原稿

〈福龍週記〉原稿

唔少漫畫迷都上黎朝聖,你呢?

Showroom善用所有空間,連飾櫃本身都係精品。

負責人Dicky極友善,係吹水良伴。

左面上下兩款係特別版「鐵將縱橫信心寶證2013至塑年曆紀念卡」,出面街無架。