fbpx
Mobile games, 主頁, 手機/電腦 — 11/10/2012 at 12:00 pm

免費手機新Game:十粒星打飛機

by

打大佬,敵方隻飛機好大隻呀。

下載過N咁多打飛機遊戲,無一個及得上「War In Galaxy Lite」咁好玩,畫面好靚咩?唔係,聲效好正?都唔係啫,好玩在User-friendly,唔會出現無從控制飛機嘅最最最最最根本缺點。

一貫滾軸直向打飛機遊戲,見飛機射飛機,見母艦射母艦,有金幣食金幣,有武器食武器,簡單直接。一般打飛機Game,淨係控制飛機走向同發砲已經激到一頭煙,最憎係左下角一個虛擬十字槓,右下角一個發砲Button,大佬呀,iPhone個Mon有幾大呀,兩隻手指同時篤,根本就遮住晒個Mon,仲點玩落去先?更甚者要篤住飛機本身移動飛行走向,搞到左手手指戟住右手手指,打晒交叉咁,你玩埋我嗰份嘞。「War In Galaxy Lite」就Easy好多嘞,傾斜手機左或右,飛機就會飛向左或右,而敵機只會出現喺前方,絕對唔會喺背脊出現,單一方向發砲梗係易Handle得多。難度方面,越升Level敵機出現次數越多、飛行速度越快、火力越強大,你淨係得左閃同右避,都OK難玩架,我十粒星推介,唔下載就笨呀。

iPhone下載:https://itunes.apple.com/hk/app/war-in-galaxy-lite/id562210679?l=zh&mt=8&ls=1

左閃右避,好易控制。