fbpx
主頁, 動漫資訊, 潮玩新聞 — 10/10/2012 at 12:00 pm

《鐵將縱橫》悼南丫島死難者

by

第三十三期《鐵將縱橫》$15,用黑白灰三色悼念南丫島撞船死難者。

我諗今年全香港人都過咗個極不愉快嘅十一國慶,三十九條人命,隨住短暫璀燦嘅煙花墮入無情大海,原本開開心心嘅一晚,竟然弄得個陰陽永訣,人月兩團月?呸!怒罵天地不仁就真,打呢篇稿嘅刻下,我個心都有啲慼慼然。

都說人間有情,邱福龍喺今期第三十三期《鐵將縱橫》嘅〈福龍週記〉裡面,畫咗三束鮮花悼念死者,佢用字簡單,但句句真摯:「……睇住不幸意外嘅發生,偏偏又無能為力,心裡面真係非常之難過同悲痛!現謹以手繪鮮花三束,悼念喺南丫島撞船事故中遇難嘅38名死者,R.I.P。同時亦祝願傷者們全速康復,各家屬早日走出陰霾,好好生活。船難翌日,心情依然未能平伏,深感人生無常、人之渺小,明明開開心心出海睇煙花,點解頃刻竟會變成生離死別家散人亡?上天之殘忍,令我不勝欷歔……」正因為咁,今期封面字體特別改用黑白灰三色為主調色,以表示對死者嘅懷念,感覺非常下半旗Feel,印象中都係港漫歷史嘅第一次。都係嗰句,做人應該活在當下,因為人生實在太多未知數,分分鐘出街無端端一個旱天雷就可以攞你命,所以有《鐵將縱橫》睇就好睇啦,盡量開心過每一日好過啦。