fbpx
Mobile games, 主頁, 手機/電腦 — 07/10/2012 at 2:00 pm

手機新Game:坦克孤軍作戰

by

紅色係砲台,遠程攻擊有著數。

「Astro Tank Lite」係一隻玩到我人中出汗嘅遊戲,我就只得孤兒仔坦克一大架,但要面對成群敵人圍攻,非常緊張刺激。夠膽講由第一關開始已經好難玩,真係每關都捱住過,直頭可以用慘勝嚟形容。

先要讚遊戲畫面,開頭有一輪水蛇春咁長嘅旁白介紹遊戲主旨,宇宙、星球、基地、坦克畫得好細緻,科幻感好重,加埋清脆發砲聲,賣相同聲效相當討好。玩法方面,兩個字講晒──鬥射!玩法好簡單,但一啲都唔易玩,每關都有若干可移動嘅砲台追殺你,你要邊搵障礙物掩護,將所有砲台毀滅先能夠過關。畫面左右各有一圓,左圓負責坦克前後左右移動,右圓負責發砲,移動同發砲可以三百六十度全方位同時進行,即係話,坦克可以邊向前行邊向後發砲。正正因為咁,搞到我經常性左右手不協調,加上砲台有異常古惑,你識搵牆掩護佢都識,非常鬥智鬥力,唯一好彩嘅係無時間限制。畀貼士,畀心機搵牆掩護,調校到最理想發砲先作遠距離攻擊,睇準機會先發砲,好過硬橋硬物正面衝突,理論上坦克一被圍攻,保證死得!

iPhone下載:https://itunes.apple.com/hk/app/astro-tank-lite/id560752017?l=zh&mt=8&ls=1

畫面做得好細緻,我Buy。

呢個就係恐怖份子,你要殲滅佢。

基地釋放坦克,派你出戰敵人。