fbpx
主頁, 動漫資訊, 潮玩新聞 — 06/10/2012 at 12:00 pm

瑞新的心底話

by

第518期《火紅年代黑骨棠》$15

今期第518期《火紅年代黑骨棠》篇〈瑞新週記〉,真係好值得大家睇o下,自命站o係道德高地發聲o既偽衛道之士,久唔久就柴台話黑社會公仔書教壞細路,其實呢個論調真係好鬼低能同埋Out。
你睇緊o既呢堆字,理論上唔係一條News,但在下實在有感而發。點解話呢個論調低能?一,家陣細路已經唔知公仔書為何物,港漫唔係佢o地精神食糧,佢o地連拎上手都唔多願,更遑論教壞;二,黑社會公仔書雖然打打殺殺,但一樣灌輸到大是大非大道理,請睇睇瑞新點樣睇「愛國」呢兩個重比千斤o既大字,睇睇一個敢於發言、真正視香港為根o既漫畫家o既心底話──

「愛國,好多人大大聲自命愛國,但係瑞新唔覺!真o架!我去韓國一小時車程,只係見到一部Benz外國車!去日本就通街日本車!國內呢?瑞新試過N次好專心咁搵中國品牌o既車,發覺少到你搵唔到!只係比中六合彩容易少少!

「愛國但唔愛用國產車!食物呢?國內人稍為富裕少少就唔食中國牌子奶粉,o的食肆註明用外國來貨材料,或者唔用當地o既水源,竟然可好生意o的!買手錶,無人買上海出產o既陀飛輪,只會買瑞士品牌!衣服!要香港或者歐洲出品!電話、相機、攝錄機……全部想用外國貨,認為呢o的先叫好o野好品質!強國人想要李寧牌波鞋還是Nike?心照!

「愛國用把口定用實際行動?還是每個強國人都覺得中國出品唔值得擁有?其實每個中國人都用自己o既行動去證明o左自己愛國o既心,諗諗o下罪魁禍首係o個班無良心o既產品及食物製造商,偷工減腐渣工程,仲要落毒害你,令每一個您唔敢愛國!」

──睇完呢篇週記,你有無反思自己愛唔愛國?又或,有無慶幸自己仲可以o係香港自由自在地睇公仔書?

今期〈瑞期週記〉,值得一睇。