主頁, 動漫資訊, 潮玩新聞 — 05/10/2012 at 4:00 pm

《脫北者》創刊號見街,影射香港赤化!

by

《脫北者》創刊號$15

雖然無追《封神紀》,但從來都知鄭健和係有料之人,之前佢出嗰本《野狼與瑪莉》,畫功一般但故事異常啜核過癮,睇完,笑完,翻睇完,再笑完,有令人反思嘅空間,擒晚創刊嘅《脫北者》亦正正係呢類有深度嘅港漫。

《脫北者》屬短篇,講明只出三期,由鄭健和主編,鄧志輝繪畫,畫功無必要談論,總之唔係靚到啪啪聲但總算見得人有餘嗰隻,值得討論嘅係內容同埋想表達嘅訊息。故事講封閉極權國家「北國」,人民生活如行屍走肉,無不想踏上「零號火車」走向「自由國度」,主角小源初到中央車站,已經俾雷欣插咗一刀,雷欣係「國民前鋒隊」小頭目,十歲,俾國家完全洗腦,每日唱國歌要自發性地感動流淚,仲毆打自己親生爺爺,只因爺爺曾經俾偉大領導檢舉入獄,同時又同洪峯呢個包養姬妾過百嘅警局警長狼狽為奸……

睇故事架構,大家都Feel到《脫北者》影射啲乜,「脫北」,脫離北方,即係脫離我哋嘅偉大強國;「國民前鋒隊」,直頭係紅衛兵代號,唱國歌感動到喊,批鬥自己親爺爺,文革味滿到瀉;洪峯包養二三四五六七八九十奶,私生子一大堆,又正正係家陣共產黨大中小貪官腐敗實況。成本書,根本就影射緊香港呢期嘅政治問題,反洗腦所以要反國教、反紅潮所以有學民思潮、反赤化所以反西環話事人。睇完,我有少少心寒,如果廿年後嘅香港真係變成北國咁款,我諗我會哭。

洪峯係社會寄生蟲,人渣敗類。

雷欣,十歲人仔狼到用刀隊人。