主頁, 動漫資訊, 潮玩新聞 — 05/10/2012 at 2:00 pm

完全版《群俠傳》卷十八,李沉舟陣亡!

by

完全版《群俠傳》卷十八$48

先少少雞蛋裡挑骨頭,完全版《群俠傳》卷十八由冷血做封面,純個人感覺,冷血個造型真係唔多掂,司徒劍橋畫到佢成個變態殺手咁款,真係唔多符合小說裡面嘅形象,冷血係名捕喎,忠肝義膽忠到無得再忠嘅忠角喎,因乜解究要著件高領衫遮住塊面?六扇門正派高手,使乜無面見人?

講番內容,今期勁咯,成本書接近一百四十頁,全部交代李沉舟同關七驚天一戰,李沉舟因愛妻趙師容慘死遷怒皇上,要殺皇太后報仇;關七呢個情癡一貫地懵懵懂懂,皇太后唔愛佢,但佢依舊死纏難打,一廂情願地要拯救「老婆」於水深火熱之中。兩大強者,一個要殺一個要救,翻天三十六‧奇惡鬥破體無形劍氣,最後李沉舟出絕招「浩劫之拳」,將關七打到骨骼盡碎,可惜出招後無以為繼,耗盡真元,跌落斷崖慘死。

最令人印象深刻有兩幕,一,皇太后已經跌咗落海,差不多淹死,正拼命掙扎游上岸,李沉舟大可一拳了結佢,但佢對皇太后話:「此刻我的心雖然好亂好痛苦,但仍有幾分清醒,仍記得自己的原則,李沉舟從不殺女人。希望你行個方便,別迫我破戒,自動自覺多退幾步好嗎?」殺人都仲講原則,不愧一幫之主真男人;二,李沉舟出完絕招,自知生命燃盡必死,臨死將「浩劫之拳」命名為「來生再見奇緣盡」,壯懷激烈之餘亦好浪漫。別矣!李沉舟,一路好走呀。