fbpx

Sony感謝祭現場片段 PS Vita《街霸 x 鐵拳》/《SC 2》/ 3D頭戴顯示器

by

由今日開始至10月7日(星期日),喺香港會議展覽中心搞咗個「Sony感謝祭2012」,為感謝我哋又買PS3又買PS Vita,手機仲用埋Xperia keep住有幫襯,會場就擺咗PS Vita隻《街霸 X 鐵拳》俾我哋試玩同PS3聯動,仲有就係新遊戲《Sports Champion 2》,當然唔少得啱啱喺TGS試過嘅3D頭戴式顯示器!以下有相有片有靚女,想真實啲就聽日放工自己去玩吓啦!至於4K電視、Xperia手機同防水Xperia Tablet S,編輯苦茶會另文介紹,仲有,Show Girls都會另文有相睇,掂唔掂?我唔敢講,敬請留意。

httpvh://www.youtube.com/watch?v=pz7pYCa_dBY

 

各部門高層進行開幕儀式。

有個叫女僕咖啡店嘅專區,俾你試手機、Tablet等產品。至於啲女僕......嘻!另文有得睇。

 

 

《街霸 x 鐵拳》輕觸出超必 AR最好玩
唔好望女住,睇咗呢隻將會喺10月25日推出嘅PS Vita《街霸 X 鐵拳》有咩特別先。主機版出咗一排,咁o依家先出呢隻為咩呢?首先為咗你可以拎出街玩啦,仲可以用Near功能周街搵人開拖,一對一又得,二對二都得!咁出街冇大掣嘛,所以就新加入輕觸屏幕出超必功能,等你易玩少少;仲有AR功能,阿隆可以喺你張枱上出波出昇,又可以同春麗喺街影合照;另外55角色中有新角色(如Blanka、Sukura,主機版以DLC角色登場)外,角色仲可以由髮型到皮膚再到衫褲鞋自己調色,可以調出獨一無二嘅角色慢慢調,最後就係同PS3連動,一個對電視,另一個拎住部PS Vita走咗去都仲可以對打,詳細係點?可以睇官方影片就清楚晒。

httpvh://www.youtube.com/watch?v=Y2lhq8ayFaQ

httpvh://www.youtube.com/watch?v=9rcxF2YJMsg

《Sports Champions2》繼續Move

呢隻係一隻體感遊戲,唔好怪我輕輕帶過,因為體感嘢玩就玩到有啲悶。不過又咁講,喺屋企同囡囡滑吓雪打吓波郁身郁勢成身汗,又的確係增進感情同激情嘅良方,你睇Show Girl Jennifer佢玩得幾開心?所以,睇你有冇女朋友有冇細路哥跟身,先決定買唔買呢隻《Sports Champions 2》啦,10月30日出呀,嘩哈佬喂喺屋企玩啦!

httpvh://www.youtube.com/watch?v=mQO7ktliKRc

 

3D頭戴式顯示器
喺東京遊戲展試完,返到嚟又試,今次仲搵咗幾隻遊戲試,機身只係重330克,除咗整亂咗我個頭之外,我直情戴咗都唔記得戴咗,以為自己入咗虛擬境界……誇張少少啫,拍唔到片你睇有幾威,我盡寫。用《Ghost Recon》試玩的確幾啱玩,OLED雙顯示屏一隻眼一塊屏,夠晒高清,配合45度廣角視野,夠晒闊落,仲有24p真實影院模式播放幀率達24幀,好順暢,老實講震撼感勁過我屋企部40吋Bravia多多聲,而且玩咗一輪對眼都唔算太攰又冇頭暈,可接受。聲方面Virtualphones技術創造出360度音場,5.1環迴立體都好正!仲有可以睇到玩3D電影同遊戲,簡單講句,如果你成日同屋企有爭電視打機,又或者你嫌間房部電視細,5.1又唔夠闊,咁買呢部就好啱數,不過記得同阿媽講聲先,如果唔係佢睇睇吓愛回家發現你戴咗副超仲咬牙切齒頭擰擰,以為你聖羅蘭上身就唔好。
部機會喺10月中旬見街,售價$6,980,煲多次《Biohazard 6》之後又有《刺客教條 3》,啱啱好,妥晒。自己嚟感謝祭有得試過先訂之外,訂機仲送《黑超特警組 3》3D藍光碟,算新啦!