fbpx
PS3, Xbox360, 主頁, 專題熱話, 遊戲新聞 — 03/10/2012 at 7:41 pm

開機前貼士《Biohazard 6》快速自救法

by

香港人好忙嘛,平時返工要OT咯,放假唔陪女友?之前四日假你想留喺屋企打機?短暫嘅快樂換嚟痛苦……值得咩?值!如果我有得揀嘅話……講咗咁多廢話,無非都係想話有好多機迷未買《Biohazard 6》,又或者買咗未買,又或者開咗未玩,咁就啱喇,以下呢啲貼士幫你更輕鬆更盡情咁嘆喪屍。

1.應該玩阿Jake先:
首先,今次基本主角有三個,就係阿Chris、Leon同Jake,咁佢哋係喺同一條timeline度玩嘛,咁即係如果要玩得暢順,玩完一個先一個,咁啲劇情就兜嚟兜去好攰喇。所以,跟以下次序,就保證你個劇情順住去:

先用Jake完成兩個章節;

再用Leon完成兩個章節;

之後就用Chris喇,都係兩個;

之後三個主角嘅劇情就同步喇,可以逐個玩喇。

2.認清Save咗先好熄機:
今次save嘅位置唔算多,有好多都隔幾遠先有一個,咁遊戲就好體貼地有自動save系統,不過!唔好以為過咗checkpoint就save咗呀,要睇到有部細細部打字機仔先代表save緊呀!

3.用Piers做狙擊
遊戲中好多時會出現兩個角色一齊嘅關卡,呢個時候你可以揀用唔同角色。其他冇乜特別,但當有得揀Chris或Piers嗰陣就分別好大,Chris係機槍王,Piers就多數狙擊,用Piers會令戰役成績好啲,即係易過啲。

4.保持連線上網:
今集有好多時係兩人合作,呢個時候如果你set咗連線,就可能會有人加入同你合作,是福是禍真係好難講。不過同時間,Agent Hunt模式容許其他玩家入你個遊戲度扮怪物,佢哋就一定會落足全力,難度倍增,但係樂趣又大啲喎!

5.善用埋身肉摶
我明你驚俾喪屍咬,但係今集真係要善用衝刺、埋身肉摶,一拳秒喪屍。

6.避開再起身
要習慣閃避攻擊,而閃避之後又要習慣快啲起身,搵個空地練吓啦。

7.雙桿操QTE
QTE即係Quick Time Event,即係跟住顯示按掣同郁analogue。建議遇到要搖動Analogue控桿時用晒兩邊嚟搖,效果會好啲。

8.回復體力快速連技
呢隻遊戲成日令人要補血,但你補血時喪屍唔會停喺度,所以最緊要快!但係當你拎到綠色加紅色藥草想混合佢嘅時候,生死一線又有冇時間呢?以下有一個連技,如果你用PS3玩,記住,三角、X、X、X、X、O、R3、R3、R3……成個過程完美演繹。

9.記得試Agent Hunt
打爆任何一個角色之後,你就可以玩Agent Hunt模式入人哋隻遊戲度搞人哋,記得試,因為係今集最好玩嘅一種玩法。

資料來源:
http://kotaku.com/5948381/before-you-start-tips-for-playing-resident-evil-6-the-best-way?utm_medium=referral&utm_source=pulsenews