PS3, Xbox360, 主頁, 專題熱話, 遊戲新聞 — 30/09/2012 at 6:46 pm

開機前準備《Biohazard》系列故事 史詩式補習計劃

by

就算你有打勻咁多集,佢咁多條線都未必記得邊個打邊個,邊個死咗邊個消失咗。又或者,你玩過第一集之後就冇乜點打,就算打又唔係集集打爆,但係見到今集《Biohazard 6》齊晒Leon同阿Chris又多女仲要嚟埋中國好想玩,咁都想了解番個故事嘛?以下就係正傳故事回顧,我知大家時間寶貴,盡量簡潔,不過都幾長,八月十五,寂寞的人有福了。

《Biohazard 0》
唔係第一集出,只係嗰排興玩前傳,佢又走去出番第0集咁解,不過話晒正傳,故仔都叫有啲關係。從前有個研究員叫James Marcus,佢本來係Umbrella負責研究T-virus出嚟嘅研究員。Umbrella,即係呢個故事嘅邪惡組織,睇落去你就知佢乜料。話說阿James Marcus研究完T-virus之後,就俾Umbrella創辦人Spencer覺得冇乜利用價值,殺咗佢棄屍啦,咁啱佢就俾感染咗T virus嘅水蛭咬咗幾嘢,死唔去就梗係返去報牛,佢仲將啲水蛭散佈喺一架Umbrella列車上面,整咗架喪屍主題列車。喪屍唔識開車,咁就梗係炒車啦,Raccoon市就派咗Stars Bravo小隊去現場調查喇,不過,死得嘅都死晒。

今集女主角,18歲嘅Rebecca Chambers出場,身為佗槍師姐嘅佢發現一輛囚車,為咗搵番Billy Coen呢條殺咗23個人嘅逃犯就四圍行,搵搵吓,竟然去到喪屍列車嗰度……見到喪屍嚇到飛街嘅Rebecca,好彩有Billy現身救咗佢,咁呢個時候仲邊有話邊個捉邊個吖?有個男人喺身邊個人定好多。就喺呢個時候架車就開動咗,仲撞咗去Umbrella嘅新研究設施,喺研究所入面,Umbrella要員Wesker決定走人,只係希望引班S.T.A.R.S.嘅Alpha小隊去洋館度測試生化武器,即係第一集嘅故事啦;而另一個William就決定繼續研究更強嘅G-virus,不過就開咗自爆裝置要炸咗個養成所,以免俾人有證據爆大鑊。
搞一大輪打一大輪,Rebecca發現Billy原來以前係軍人,只係俾上司人屈殺人,即係好人啦。最後,Billy同Rebecca就打贏咗今集最後大佬—諗住要執牛嘅James。最後養成所自爆,Rebecca放走咗Billy,話會同人講佢已經死咗,之後再向洋館進發喇……

 

Rebecca

 

Billy

 

 

Wesker

 

william

 

《Biohazard 1》
上一集講到Umbrella嘅Wesker決定引S.T.A.R.嘅Alpha team去洋館測試生化武器,點引呢?搵嘢食引?搵靚女引?原來,條Wesker同時係S.T.A.R.S.一員,仲係阿頭,即係入嚟做無間道,咁老點佢哋入去就得啦!使鬼引。咁都係打嚟打去搞一大輪,隊員Chris同Jill又打喪屍又打喪乜喪物之後就發現Umbrella係搞呢鑊粥出嚟嘅幕後黑手,仲知道Wisker嘅陰謀。最後Wesker被殺(當然之後又翻生,未死),Chris同Jill用火箭炮搞掂埋Tyrant,養成所爆炸,收皮。而Chris嘅中途仲救埋Rebecca添。


《Biohazard 2-3》
好喇,嚟到《Biohazard 3》喇。喂!第二集呢?以時間線嚟講,第二集係攝喺第三集中間嘅,所以,跟番個時間啦。Umbrella未死嗰件William成功研究咗G-virus,但俾總部追殺搶數據,最後臨死就打G-virus落自己度變大再變大,互揪期間,Raccoon City嘅地下水道研究所流晒啲T-virus出嚟,由變成喪鼠嘅老鼠傳播俾人類,搞到Raccoon City喪屍大爆發。第一集嘅女主角Jill靚咗好多,今集喺城入面救人,而同時亦遇到Umbrella派嚟救人嘅鏞兵Carlos,但呢條Carlos就唔知壇嘢係Umbrella搞出嚟嘅,仲好有正義感咁款。Jill同Carlos拍住救人殺喪屍期間,Umbrella派出生化名物Nemesis出嚟追殺S.T.A.R.S.隊員。咁Jill就中咗Nemesis招, 賴咗T virus昏迷咗,之後就等Carlos搵血清救佢喇。

Jill未醒之時,就係《Biohazard 2》故事開始,當時仲未靚仔嘅Leon出場,作為警察新仔嘅佢,未出發先興奮,喺城入面四圍救人,仲遇到另一關鍵人物Ada!Ada同Leon話係嚟搵未婚夫John(Umbrella研究員),實際佢係幫Wesker做嘢嘅,Wesker未死咩?係呀,又係臨死打咗T-virus落自己度,但又冇變喪屍,身體好咗,身手又好咗,人都青靚白淨咗。今集另一條線仲有Chris個妹Claire,佢嚟搵Chris,但原來大佬去咗歐洲調查Umbrella總部……仲有個叫Sherry,係研究到G-virus嗰個William個女,而G-virus樣本就係收埋喺佢條頸鏈度……
最後Leon發覺Ada係奸嘅,但又冧人哋,同時間Ada亦都對Leon動咗啲真情……最後Ada殺唔落Leon,但就俾Sherry阿媽Annette射咗一槍……Leon仲以為佢死咗,鬼咁傷心,當然,Ada原來未死……之後冇乜曲折離奇,飛!又打完一大輪,之後Leon同Sherry加埋Claire就走甩晒,

去番《Biohazard 3》,Jill醒返之後,同Carlos順利去到廢水處理廠打終極大佬第3形態Nemesis,搞掂之後,喺Jill同Carlos坐直機走人同時,美國政府都派戰機炸咗Raccoon City喇。

 

Jill大個女

Leon

Ada

 

 

Claire

 

Sherry

 

 

《Biohazard 4》
2004年,即係1998年Raccoon City炸爆之後第6年,Umbrella都冇晒動靜,靚仔Leon今集終於靚仔,變咗碧咸。至於故事,開端係美國總統個女Ashley俾人綁架,而紮咗職做咗總統直屬部門一員嘅Leon就奉命救人。去到歐洲一個小村落,咦喂!係喇!今集最大突破就係敵人唔係喪屍,係被寄生體Plagas寄生嘅人類,咁有咩唔同呢?行得跑得玩合作識立架生識諗嘢囉。之後一路查就識到個叫Louis嘅前警員,曾經幫邪教Los Illuminados工作過,識唔少嘢。之後救到Ashley,但就發現佢俾人打咗啲寄生體入去,咁又係走嚟走去搵解救方法啦。之後就搵到教主Saddler,原來捉人個女都係想搵啲錢營運個邪教,認真單純。又喺途中,Leon見到Ada喇!咁Leon變咗碧咸,Ada都要變李冰冰啦!今次高叉又低胸,妥好多。但佢點解會出現?原來都係繼續為Wesker撈嘢,佢哋想得到呢種寄生體力量。最後Louis犧牲咗,Leon打完教主條o靚Krauser,之後同Ada合力又打教主,贏咗之後Ada攞咗樣本又走人,又係殺唔落Leon之餘,仲俾咗條匙Leon,幫咗佢哋,而Leon就帶總統個女返去領功喇。到底Ada同Leon嘅關係會變成點?都係我想玩第六集嘅重點之一呀!中秋節流流,祝佢哋人月兩團圓。

 

Ashley

Leon

Ada

 

《Biohazard 5》
今集又輪番到Chris,而且仲去咗非洲,辛苦晒。話說Umbrella玩完後有唔少生化武器技術流到恐怖份子手上,咁政府就成立咗個反生化襲擊嘅組織BSAA。佢哋收到風話非洲一個地區會有生化襲擊,咁就派咗Alpha Team去啦,Chris帶頭,仲有個女黑人同伴Sheva幫拖。今次班非洲人賴咗嘅係叫Majini,係第二形態寄生體,口服,好方便。而呢個時候,Chris竟然發現第一集嘅同伴阿Jill都喺度!仲好似係敵人一方!回憶番,原來喺2006年,佢同阿Jill發現死極唔去嘅Wesker現身Umbrella創辦人Spencer間屋,喺追捕間,Jill為咗救Chris而攬住Wesker跳落懸崖,不過懸崖之嘛,梗係唔死得啦!喺調查呢個Uroboros計劃時,Chris遇返Jill,原來佢俾Wesker裝咗個高科技電子零件喺心口被控制!打贏之後,Jill都被救番,而Chris就繼續追查,當中亦講到Wesker嘅來歷,原來當年Spencer捉咗班小朋友研究T-virus,最後融合完唔死得嘅得番Wesker……之後Wesker殺咗Spencer,而佢個Uroboros計劃就係將T-virus同G-virus結合,製造「新人類」,想為人類進化……最後,都係打打殺殺變形態再打再殺,Wesker打輸跌落溶岩……死未?你話呢?玩第六集啦!

 

Chris