fbpx
PS Vita, 主頁, 人物專訪, 專題熱話, 遊戲新聞 — 26/09/2012 at 10:58 pm

稻船敬二訪問 「犧牲了工作換來《Soul Sacrifice》!」

by

延至下年春天推出嘅PS Vita動作遊戲《Soul Sacrifice》,由稻船敬二領軍的comcept作企劃,Marvelous AQL開發。可以四人連線合作,人人都諗起《Monster Hunter》,到底曾開發《鬼武者》、《Lost Planet》等名作嘅著名製作人稻船敬二又點睇?對於遊戲救贖同犧牲嘅主題又有咩見解?喺東京遊戲展期間就安排咗一個傳媒訪問,講到犧牲方面,佢就話:「我做呢隻遊戲都犧牲咗好多,例如……我犧牲咗喺Capcom嘅職位,自組公司先可以完成《Soul Sacrifice》。」呢個係對舊公司嘅控訴,定一話為咗強調開發嘅自由度呢?

問:遊戲中以救贖同犧牲為主題,對遊戲故事會有咩影響?
稻船敬二:選擇犧牲同伴或由怪物回復原貌嘅人類,會令玩家攻擊力增加;如選擇救贖,就會增加生命力同防守力……玩家嘅選擇當然會影響能力同故事發展。至於能否一直只選擇救贖或犧牲,基本上係可以嘅,但咁樣令能力變得唔平均,可能會好難繼續遊戲。

問:遊戲更加可以犧牲同伴,咁樣玩法會唔會搞到啲friend嬲呀?
稻船敬二:其實遊戲入面你可以犧牲同伴之餘,都可以救佢哋,令佢哋翻生。同時,亦有機會犧牲自己,因為死後會化為靈魂繼續喺戰場上面幫隊友搵出敵人弱點或者弱化敵人,所以死咗並唔代表玩完呢局遊戲,況且,有時面對強大嘅敵人,可以犧牲自己打敗敵人,都係合作嘅一種,可以做英雄喎,幾有型!

問:講到犧牲咁有型,咁你製作呢隻遊戲犧牲咗啲咩?
稻船敬二:可以話……我犧牲咗之前嘅工作同職位,自組新公司,先可以有咁大自由度同咁多時間,慢慢開發到呢隻遊戲囉。

問:面對戰敗變番人類嘅敵人,點樣決定犧牲佢定救贖佢呢?
稻船敬二:每隻怪物背後都會有佢嘅故事,會係因為唔同慾望而變成怪物,你可以諗吓呢個人值唔值得救贖先決定。

問:犧牲得多同救贖得多,除咗能力外,主角個樣會唔會變?
稻船敬二:主角外型都會因為攻擊力或者防衛力變強而改變。

問:咁遊戲裏頭會唔會有唔同武器同防具組合?
稻船敬二:唔會,因為呢個遊戲係以魔法為主。

問:呢舖死咗犧牲咗,嗰個角色下舖又可以翻生,咁兒戲嘅?
稻船敬二:遊戲個故事係講佢哋入咗本書度,化身成魔法師,戰鬥嘅時候唔係喺真實世界,所以喺書入面死咗,現實世界其實又未死喎,下舖咪可以再嚟過囉。

問:呢隻遊戲又係動作遊戲,又可以四人連線,令人聯想到同《Monster Hunter》喎?
稻船敬二:遊戲分好多類,例如有動作遊戲,又有RPG,如果動作遊戲又可以合作就係類似嘅話,咁每款動作遊戲都係差唔多?唔所以可以咁講嘅,遊戲嘅內容、故事同玩法都有好多唔同嘅地方。

問:咁會唔會有中文版呀?
稻船敬二:唔……我哋呢個記者會都請咗好多中文嘅媒體嚟,所以我哋係好重視唔同語言嘅玩家嘅,如果我哋有最新消息就會公佈,敬請留意。

 

遊戲影片
httpvh://www.youtube.com/watch?v=GHb-tFe1rTQ

httpvh://www.youtube.com/watch?v=YnGbf_lYo4I

官方網站
http://www.jp.playstation.com/scej/title/soulsacrifice/ja/