fbpx
主頁, 動漫資訊, 潮玩新聞 — 14/09/2012 at 12:00 pm

明反國教科,向瑞新致敬!

by

黑底白字講明自己立場,瑞新我服你呀。

個人感覺,芸芸香港漫畫家,黃玉郎擺明係為錢看嘅商家佬,馬Sir早早上岸不問世事升呢做神人,牛佬係個連手機都無嘅奇人,福龍玩世不恭係個長不大的中佬,瑞新呢,係個最有血有肉最有性格嘅香港人。

好怪呀呵?居然用「香港人」三字形容瑞新,邊個唔知瑞新係香港人?我咁講,係因為佢關心香港,關心時事,書中一言一語,尤其係〈瑞新周記〉,都跟住香港呢個貧富懸殊大都市嘅脈搏走,又鍾意將現實世界發生嘅故事套入自己虛構嘅漫畫情節當中。想當年佢出過一本《老懵董》,已經極盡挖苦之能事,形容董建華好心做錯事,漸漸變成一個無可救藥嘅變態殺手,我已經拍爛手掌。

今期《火紅年代黑骨棠》同《火武耀揚》,瑞新唔寫周記,改用黑底白字表明反國教立場──「拒絕洗腦,反對德育及國民教育科,香港的將來,靠你了!」唔使長篇大論,唔使細緻分析,唔使甚麼動之以情曉之以理,因為心底話已經係大是大非大道理,佢覺得應該講,就講,就係咁簡單。或者我多慮啦,雖知瑞新畫嘅係江湖漫畫,要包膠袋嗰隻,一個唔好彩大話精梁振英變埋小器鬼,玩秋後算帳,玩封殺,他日求其整個「為免黑社會禍及下一代」之類嘅無聊藉口封殺瑞新,佢隨時吃不了,兜著走,單係呢份道德勇氣,已足以我向呢個有血有肉嘅香港人致敬。

《火武耀揚》第673期$15

《火紅年代黑骨棠》第515期$15