fbpx
iPhone, 主頁, 手機/電腦 — 13/09/2012 at 2:26 am

iPhone5嚟料! 4”「大芒」Retina

by

 

講到好期待嘅iPhone5終於喺三藩市Yerba Buena Center現真身,老實!睇硬件,真係令人好唔期待,係咪無咗教主就只有行貨示人?

首先第一樣大改進點,係個芒由3.5”升級到4”,唔該!你唔講我真係唔多覺囉!由於都係Retina,由於大芒咗,所以解析度由960 x 640升級到1,136 x 640,不過Pixels仍然係326 ppi,所以在技術上真係無大改進!但在觀感上,由於芒大咗,除咗最底工具欄無變外,放Apps嘅Desktop位,會由四行x四格,會略微升級到五行x四格。

至於機身方面,就明顯薄身咗,由4s嘅9.3mm下調至7.6mm,足足薄咗18%,重量亦由140g減磅至112g,但機身仍然採用鋁金屬加強化玻璃,手感明顯應該會好咗!至於處理器方面,就稍見長足進步,由iPhone 4s嘅Dual-core A5,升級到全新A6處理器,據稱運行速度係提升咗2倍圖像處理能力,不過體積反而縮細咗22%,所以機身先做到咁細咁薄!雖然處理能力高咗,但運行時間仍然係佢嘅強項,基本3G瀏覽時間達8小時、通話時間亦有8小時,如果作影片播放更可達10小時。

傳輸線連叉電線方,一如網上傳聞,iPhone 5 由舊款的 30 針接頭,升級至更加纖薄輕巧的「全數位 8 道訊號端」-- Lightning 接頭,Lightning 另一項聰明之處,係佢使用雙面可用設計,所以從此插入接線時,再唔會有正反面嘅問題。

 

至於網絡制式唔使講嘢,都係跟返大潮流,行4G LTE;另外,仲好把炮話有樣新技術──ultrafast wireless,就係以5GHz 802.11n Wi-Fi……,唔通Apple仲想大煲佢個Face Time?如果係就大煲喇!

相機鏡頭方面,仍然停滯喺800萬像素,數字上無驚喜,但感光元件就細咗25%,而且仲有一個叫 Dynamic low light mode,喺大家最鍾意嘅現場光硬0趙下(無閃燈),噪訊會減得更低,而且處理成像會快上40%。

發售日期就有啲驚喜!21/9派街!仲要係香港、美國、加拿大、日本、英國、德國、法國、澳洲、星加坡……同步推出,機價同iPhone 4s推出時一樣,199美金/16GB、299美金/32GB、399美金/64GB;14/9開始接受預訂!