fbpx
PS3, 主頁, 專題熱話, 遊戲新聞 — 13/09/2012 at 9:00 am

59張新圖 《JOJO奇妙冒險 All Star Battle》新系統新人物介紹

by

轉自日本《Fami通》最新料。我夠膽講句,睇完呢59張新圖,JoJo迷瞓街都要買,冇機都要儲一隻!呢隻PS3獨佔遊戲由Namco Bandai Games推出、開發過《火影忍者》系列以及《.hack》系列嘅Cyberconnect2開發,格鬥系統一定唔差,睇埋畫面,超必有特寫,收盡第一至第七部故事,仲可以用「JoJo立」嚟避開敵人攻擊再反擊,確係正到核爆!今次仲正式有埋大量公佈咗嘅四個新角色新圖片,黃金體驗同喬魯諾·喬巴拿,加埋性感手槍同葛德·米斯達,綠色法皇加花京院典明同銀戰車加J·P·波魯那雷夫,啊啦啊啦啊啦啊啦啊啦啊啦啊啦啊啦啊啦!

講吓系統先,首先,能源一條就梗喇,而能源下方仲有條「保護計」,呢個係會隨住你防守而減少,到減晒嘅時候,就會有一段時間冇得擋,雖然會慢慢回復,但就令玩家唔可以一味拉後擋擋擋,要打得進取啲呀!

第二,就係格鬥遊戲唔少得嘅必殺技,下方嗰條就係波紋必殺技計,分為三段可以儲,越儲得多,一次過爆發梗係越強橫啦!而且必殺技仲有超華麗特寫,睇吓啲圖,嗚!

第三,JoJo最出名嘅除咗係有劇情有靚畫之外,就係主角們嘅扭身扭勢「JoJo立」,呢款遊戲都有得出呢招!而且仲可以用嚟避開敵人嘅攻擊,睇圖係避開之後敵人會露出極大空檔!真係笑中有淚o架!

第四,係可以發動挑釁,成功發動又係有特寫畫面,會減低敵人嘅各種計量。

第五,有類似《街霸 IV》嘅「目押」技,即係講求節奏地以強中弱按鍵組合出連續技。冇玩開格鬥遊戲嘅Jo迷放心!呢種高階攻擊亦有簡易輸入法可以揀取,輕輕鬆鬆快快樂樂使出華麗嘅攻擊!

第六,當然唔只替身,本體主角都可以作出攻擊。

最後,下周舉行嘅東京遊戲展會有試玩,我夠膽講句,我一定排隊,到時再同大家報告!

 

四大新角色:喬魯諾·喬巴拿、葛德·米斯達、花京院典明、J·P·波魯那雷夫

 

資料來源
http://www.famitsu.com/news/201209/13020986.html?utm_medium=referral&utm_source=pulsenews

舊報導 有片

新片速報 PS3獨佔動作遊戲 第一部打到第七部《JOJO奇妙冒險 All Star Battle》

遊戲官網
http://www.bandaigames.channel.or.jp/list/asb/