fbpx
Mobile games, 主頁, 手機/電腦 — 11/09/2012 at 2:00 pm

手機新Game:大隻佬怕蜜蜂

by

英雄最怕病折磨,爛佬怕潑婦,咁大隻佬怕乜?原來怕蜜蜂,話知你手瓜粗過碌柱、六舊腹肌皆陣列在前,一隻細小蜜蜂足以嚇到大隻佬嗌阿媽救命,釘到佢面目浮腫不似人形。
搞笑遊戲「Angry Man Of Bugs」,呢個Man外形好Man,但衰在中看不中用,大大隻隻居然勁怕痛。佢唔只Angry,直頭係Scare,Scare of bee,作為玩家o既你,一見到蜜蜂出現就要即時殺牠死,唔好俾蜜蜂針到大隻佬,針到五次,大隻佬就一命嗚呼。難唔難玩?一般啦,蜜蜂數目會越來越多,行動又快捷,想殺牠死就要眼明手快,久唔久會出個藥箱畀你補充生命,又或出支殺蟲水方便你一次過殺幾隻蜜蜂。千其咪懶醒用手指打圈亂畫個Mon,以為咁樣就可以一網打盡,我試過,呢招唔Work,總有一兩隻蜜蜂漏網,都係畀心機玩,見隻殺隻啦。

iPhone下載:https://itunes.apple.com/hk/app/angry-man-of-bugs/id557491698?l=zh&mt=8&ls=1

俾蜜蜂針到血都嘔埋,不過好彩,有個藥箱救o下命。

殺蟲水有強大殺傷力,一支在手,蜜蜂無得走。