主頁, 動漫資訊, 潮玩新聞 — 03/09/2012 at 4:00 pm

完全版《群俠傳》卷十六,趙師容香消玉殞!

by

完全版《群俠傳》卷十六$48

有涯隨無涯,正因時間太少,漫畫太多,所以完全版《群俠傳》我多數睇一次就擺埋入櫃收藏,惟獨今期卷十六我翻睇三次,準確講,我翻睇o左第92至103頁三次,因為呢短短十頁,了結o左趙師容一生。

趙師容,權力幫二當家,出塵美貌同驚人智慧令柳五同李沉舟同時傾心,柳五企圖勾二嫂,兄弟最終反目收場,估唔到最後兩人都得唔到呢位江湖第一美人,因為覬覦佢美色o既白愁飛因愛未遂,借元十三限之手殺人。下雪天,市場上,元十三限一招仇極掌廢趙師容雙肩,趙師容誓死反抗,元十三限本只想活捉,不欲殺人,打鬥間趙師容卻被一支無聲無色o既暗器貫穿心房,死不瞑目,發暗器者,正正係奸到出汁o既白愁飛。人間有愛,蒼天卻是無情,可悲可憐可恨,趙師容,雖然你一向只擔當花瓶角色,但我永遠懷念你呀。
同期交代神州奇俠簫秋水,點解要假扮九現神龍戚少商,原來練「忘情天書」有成者,會漸漸脫離七情六慾所困,簫秋水就係怕自己會喪失人應該有o既喜怒哀樂,所以借用戚少商身份,嘗試透過處處留情重嘗人間感情為何物。同時,o係海角仙蹤同燕狂徒o既第二戰亦圓滿結束,戰果始終係「忘情天書」勝「破體無形劍氣」半籌,燕狂徒敗得心服口服,只好約戰下世,希望來世可以延續宿敵第三戰。

隨書附送溫瑞安群俠傳唐斬Postcard一張。