fbpx
主頁, 動漫資訊, 潮玩新聞 — 01/09/2012 at 12:00 pm

《至喪檔案》試刊號見街

by

《至喪檔案》試刊號$22

牛佬分鏡起字加倫裕國無敵面相,輯錄番《爽報》連載過嘅案件重溫式漫畫《至喪檔案》試刊號擒日見街,橫開度,封面用番舊畫拼貼而成,大字標題「社會實況改編連環圖,開拓香港漫畫新氣象」,呢十六個大字,你Buy唔Buy?

全書有八個短篇故事,分別係〈淫間道〉、〈一屋兩夫〉、〈一箭三鵰〉、〈毒男〉、〈驅鬼〉、〈網上情人〉、〈暴風少女〉同〈北嫂〉,每個故事開首都有段小文字簡介,如無意外應該出自牛佬手筆。Total有64頁,內容係平時薄裝港漫一倍,應該好襟睇,公仔水準唔使擔心,「倫裕國」三個字已經係金漆招牌,問題係之前喺免費報紙《爽報》有得睇,加陣要你科水廿二皮,抵唔抵就真係見仁見智。我捧開牛佬場,搭地鐵又怕無聊手Fing Fing,如無意外都會買本消磨時間,不過性質實屬舊瓶舊酒,連牛佬都唔敢用「創刊號」而用「試刊號」名之,可知呢本漫畫都未必有下期。