fbpx
主頁, 動漫資訊, 潮玩新聞 — 30/08/2012 at 12:00 pm

《宮本武藏的末世傳人》出年先出第二期?

by

創刊號《宮本武藏的末世傳人》$48

未睇過《宮本武藏的末世傳人》小說,唔敢斷定孫威軍畫嘅漫畫版是否跟足原著,如果真係無任何刪減改動的話,咁小說作者天航真係幾難能可貴,作為一個理應被影像寵壞荼毒到漠視文字存在嘅九十後,呢本小說可讀性應該相當高。

漫畫版故事節奏好明快,十頁八頁已經交到故事大概──殺手架構「九歌」肆虐,警界老一賈釗奉命緝兇。主角賴飛雲,身懷「人體磁場」異能,手執鐵樺木劍鋤奸,與干將、莫邪、蒙恬、蒙武一眾殺手周旋,任務之一係保護可以同靈魂溝通嘅女主角巫潔靈,兩人遇上第一殺手王猇,性命堪虞,賴飛雲更被揭發擁有「天使之血」,同王猇呢個「魔鬼的後裔」係天生宿敵云云。故事脈絡OK,孫威軍畫風都好乾淨利落,感覺好重日漫味,尤其五官面相同髮型,簡直同日漫無分別,一句講晒唔討厭,睇慣港漫嘅漫畫迷可能要花少少時間適應,但整體值九十分以上。

千其唔好錯過書末一篇〈天航後記〉,天航怒斥非法下載,擔心網上免費漫畫會影響銷量,發誓話:「這部漫畫首刷量不多,比本人小說的首刷量還低,我暗暗立下重誓,如果首刷賣不光,我就真的自己掏錢出來『令它售罄』,哪怕要向經常打來煩我的花X銀行舉債借錢,我亦義無反顧、轟烈無悔。」從來覺得上網睇免費漫畫之輩係賊,呢個世界仲有天航呢亭只買正版嘅九十後,匪夷所思。

更匪夷所思嘅事陸續有來,書末大字標題寫住第二期漫畫「預定2013年初出版」,嘩,唔係啩?出年?幾好睇都假啦,到時讀者仲記唔記得呢本漫畫都成問題啦。好明顯係孫威軍畫唔切,點解唔畫定多幾期存稿先創刊?呢一著,真係失策咗啲喎。