fbpx
PS3, Xbox360, 主頁, 人物專訪, 專題熱話, 遊戲新聞 — 30/08/2012 at 12:30 am

直擊《Biohazard 6》發佈會 「今集有中文對白!」製作人小林裕幸訪問

by

 

今日(29日)Capcom就喺香港唯港薈宴會廳搞咗個《Biohazard 6》特別發佈會,睇完娜姐我都唔走住,就係因為有得訪問遊戲製作人小林裕幸先生。以下就輯錄訪問內容,原來遊戲都會同近排大熱嘅《Sleeping Dogs》一樣,收錄一啲中文對白!而最引人入勝係被問到新遊戲會唔會有類似第五集嘅對戰模式玩時,佢窒咗一窒,之後有啲尷尬咁話:「未可以確定咁答你住,請大家繼續留意新情報。」見到佢咁嘅反應,你話冇我都唔信。

以下係集合各傳媒嘅發問內容,有啲goo都google到嘅問題,唔係我問,請勿誤會。

記者:隻game玩到幾耐呀?
小林:故事模式,玩得順利嘅話,大約30個鐘可以完成。

記者:聽講話今集有兩個Ada喎,一個係複製人,一個係真人,真唔真?
小林:唔真,得一個Ada啫。

記者:請問你最鍾意歷代邊個角色?
小林:第六集嘅Leon。

記者:遊戲入面嘅中國,係咪以香港為藍本?
小林:製作團隊去咗中國好多地方做資料搜集,所以遊戲中嘅背景都會集合唔同城市嘅特色,唔只淨係似香港。

記者:今集難度方面係咪減低咗?
小林:我只可以講,就算從來冇玩過呢個系列嘅玩家,都可以玩得開心冇問題。

記者:今集好似加強咗近身作戰嘅重要性喎?
小林:唔會只係著重近身作戰,都會加入唔同嘅動作,亦都會保留系列風格。

記者:咁今集有咩新突破呀?
小林:今集最新玩法之一,就係四個主角四條主線,係會同時進行,所以劇情會互相影響。一個主角嘅決定同選擇,會影響其他三個主角嘅遊戲劇情發展。

記者:會唔會有第五集嘅對戰模式玩呀?
小林:呢個暫時唔可以確定咁答你,請大家繼續留意遊戲情報……