fbpx
主頁, 動漫資訊, 潮玩新聞 — 27/08/2012 at 4:00 pm

《蒼天霸皇》新一章故事〈藏龍帝穴〉登場

by

明眼人一眼睇得出,黃玉郎投放最多資源o係《蒼天霸皇》,無論畫功線條、故事脈絡、分鏡實景、角色設定甚至專欄,感覺都比旗下其他漫畫勝一籌。今期《蒼天霸皇》開新一章故事〈藏龍帝穴〉,大搞花臣,如果《石黑龍傳》都有咁o既質素,我諗討論區班專雞蛋裡挑骨頭同專作人生攻擊o既C-Hing會無聲出o羅。

花臣一,拉頁封面大晒冷,由最初o既周武王姬發到依家o既成吉思汗鐵木真,八個歷代天子皆列陣在前,雖然當中有的是舊畫,但拼埋一齊都OK有氣勢,亦不禁令人回想,咁多個天子,我仲認得幾多個?花臣二,隨書附送《神兵玄奇》玉皇朝經典漫畫人物簽名板一張,家陣畫板熱潮未退,望落好似無乜價值,但擺十年八年再掟上網,可能賣到好價錢;花臣三,順住家陣草圖版熱潮,輯錄以往多期內文草圖,純鉛筆稿好Raw,無落色,但可以欣賞到主筆獨特筆觸,我最Buy;花臣四,整多個「玉皇朝天子大懸賞」畀你嘆,剪低參加表格參加問答遊戲,答o岩問題就有機會得到黃玉郎私人珍藏名作掛畫、《神兵玄奇》再生原畫等等,總之就一味大堆頭熱熱鬧鬧……講真,搞多o的呢類花臣,香港漫畫咪有生路o羅,親愛的黃生,呢鋪我支持你呀。

隨書附送《神兵玄奇》玉皇朝經典漫畫人物簽名板一張,好好收藏啦。

《蒼天霸皇》第二十三期,$15。