主頁, 編輯Blog — 04/11/2014 at 12:39 am

【編輯Blog】苦茶:Q版MACROSS艦偷運入境成功! 等噴消光加水貼

by

TF20141103_00

MACROSS嘅玩具, 對我哋呢類上咗年紀嘅老玩家, 真係完全係冇免疫力! 終於俾我買到架Q版母艦, 我真係好耐冇買過咁大盒嘢返屋企, 我知! 同隻夜鶯, 又或者嚟緊PG獨角獸, 簡直係小巫見大巫吖嘛! 但對於我呢類習慣玩偷運入境嘅人, 係一件好大逆不道嘅事! 不過可能我近幾年個底好, 「聖上」都只係超咗我兩嘢, 真係皇恩浩蕩呀!

講返隻嘢, 起初掃場影盒面相時已經覺得好正, 不過係唔敢買, 但當我夜晚上玩具網gunjap睇佢啲開盒相, ! 大佬呀! 幾百蚊貨仔邊有咁DETAIL! 於事就的起心肝買。一開盒, 當然正到冇朋友啦! 個大頭仔LOOK, 係成隻嘢靈魂所在, 睇見都超爆趣; 變形系統, 都係非常好玩, 其實咁多年嚟, 我都唔多明隻艦點變成機械人, 玩完之後, 先知原來個身要翻轉180, 而且兩支炮仲要旋轉, 反而對腳就冇乜點郁過; 再諗返電視裏面啲人, 俾啲升升降降嘅地板, 攪到碌嚟碌去, 我終於明點解喇!

玩呢隻嘢有兩個感動位, 第一個係將肩頭孖炮, 放落嚟同個頭齊平, 呢個係好經典一幕, 需知呢隻Q版艦係大頭仔, 咁都俾佢諗到方法, 做出呢個形態, 我覺得真係要俾個讚佢, 另一個激讚位, 係跟送嘅兩隻細細韋基利, 真心! 有佢兩個護航, 成件事除咗係大件夾抵食, 更重要係成件事冇咁寡! 雖然兩隻細機唔會變形, 不過腳仔竟然係有得換架! 原身係直腳, 跟送各人一隻曲腳, 畀你砌情景, 我真係覺得好有誠意, 而且$640價錢, 有咁大隻MACROSS畀你玩喎, 都係皇恩浩蕩嗰隻啦!

不過你話要鬧位, 都有架! 要掹掹插插先變到形, 真係有啲失咗玩變形嘅神緒! 變成艦嘅樣, 明顯冇機械人形態咁正, 呢個亦都係少少遺憾, 最失敗係成隻嘢膠感太重……我問咗砌模型嘅朋友, 佢介紹我用噴罐嘅消光同佢薄薄上一層, 應該可以解決到呢個問題! 我問佢點解唔用噴槍薄上? 佢話原來噴槍嘅油比較易起油同刮花, 噴罐油相對會硬身好多, 如果你都想咁玩, 真係要留意呢點; 我老死仲話會幫手同我噴, 而且仲會上埋少少水貼嗰隻, 如果我隻嘢攪掂咗, 會再貼文出嚟同大家SHARE!

gunjap中毒相片

TF20141103_01 TF20141103_02 TF20141103_03 TF20141103_04 TF20141103_05 TF20141103_06 TF20141103_07 TF20141103_08 TF20141103_09 TF20141103_10 TF20141103_11 TF20141103_12 TF20141103_13 TF20141103_14 TF20141103_15 TF20141103_16 TF20141103_17 TF20141103_18 TF20141103_19 TF20141103_20 TF20141103_21 TF20141103_22