fbpx
PS Vita, 主頁, 專題熱話, 遊戲新聞 — 17/08/2012 at 11:22 pm

有片有相 本地實機率先試盡《初音未來 -Project DIVA- f》

by

噚日SCEH喺旺角某間女僕cafe搞咗個《初音未來 -Project DIVA- f》傳媒試玩會,試玩隻game影限量版PS Vita都係其次,食嘢嘆啡影索女先係重點……我上去之前真係咁諗!

呢隻由SEGA推出嘅節拍遊戲會喺8月30日推出,放緊暑假嘅你心情梗係好矛盾,又想快啲到遊戲發售日,但買咗game三日後又要開學……講番正經嘢先,今次扮初音嘅Model叫Tiffie,似就唔係好似,不過都幾靚,把聲仲好cute,睇過片就知。再正經啲嘅係會場度有女僕捧啲初音咖啡、小食出場,點解我唔影個女僕?你當我唔記得咗啦。

好,嚟到最正經嘅試玩,首先部初音機真係好靚,白機為基本,機面可以貼機貼,加埋Wallpaper真係吸引,仲有背部輕觸板上嘅初音圖像,搞到我爭啲唔敢拎上手,驚有指模呀。開game,都係揀歌啦,分難中易難度,都係捽吓熒幕按吓唔同嘅掣咁,同一般節拍音樂遊戲唔同嘅係有初音MV睇。最得意嘅反而唔係遊戲本身,而係裏頭嘅AR實景功能,可以用PS Vita嘅鏡頭同初音周圍去影合照,初音仲可以放大縮細,仲有得揀唔同姿勢同表情!有幾開心呀?咪扮嘢,你明嘅!最後亦係最驚喜嘅係AR演唱玩法,只要對住張隨遊戲附送嘅AR卡(共兩款),開著呢個AR功能,初音就會立體呈現嘅張卡上面唱歌跳舞,又係可以分兩段放大,可以放到真人咁大都得,而且可以移動PS Vita嘅鏡頭睇晒初音全身,直情會覺得屋企多咗個人呀!

官方網站
http://miku.sega.jp/f/index.html

 

 

 

Tags