fbpx
主頁, 偶像資訊, 動漫資訊, 潮玩新聞 — 10/10/2014 at 10:20 pm

《獵戰》創刊 碌爆人情卡高水準之作

by
《獵戰》創刊號$15
《獵戰》創刊號$15

等咗幾日,今日終於買到《獵戰》,第一感覺係封面好靚,大紅主色擺喺報紙檔好搶眼,燙金「獵戰」二字亦好吸睛。拎上手好墜手,$15足48頁好抵睇。最厲害係可以碌到人情卡,搵其他港漫人幫手畫扉頁,睇嚟李重豪、卓知良同葉明發三位主筆人緣唔錯。

先看《獵戰》卷首語:「原著的短篇小說創於十二年前,由蘇州的竹卉小姐改編為漫畫腳本,再由鄭健和監制,卓知良、葉明發、李重豪三位漫畫人負責起稿及人物美術……最後依靠製作團隊的某位臉皮夠厚的仁兄力邀一眾漫畫人參與扉頁製作,令這短短三期漫畫或成為港漫歷史上最多主筆參與的作品。」老實,初頭都唔知「扉頁」為何物,揭多揭,明晒,原來即係每一章開首嘅第一頁,搵其他主筆畫扉頁,阿傑多同鄺志德已經率先出手,呢個嘗試幾有新鮮感噃。
故事方面,或者因為要三期講完個古仔嘅關係喇,去橋快到有啲追唔切,不過都好嘅,我都想快啲知道森林裡面隻異形係乜東東。至於畫風呢,睇主角面相同髮型就一清二楚,第一同第二章已經有好大分別,無估錯應該係出於兩個主筆之手,所以風格有如此出入,唔統一喎,會唔會唔係幾好?我就覺得無問題嘞,起碼無唔知邊個打邊個嘅情況出現。唯一要挑剔嘅係……公仔畫得大格咗少少,如果可以畫得密啲,咁就更加抵睇咯,係……我認我係好貪心嘅,哈哈!As a conclusion,《獵戰》抵撐,如無意外會買齊三期放入書櫃收藏。

鄺志德畫的扉頁
鄺志德畫的扉頁
阿傑多畫的扉頁
阿傑多畫的扉頁