fbpx
主頁, 動漫資訊, 潮玩新聞 — 16/08/2012 at 12:00 pm

完全版《群俠傳》卷十五,元十三限的底蘊!

by

完全版《群俠傳》卷十五新鮮滾熱出版,即買,今期封面……唔係醜,係略嫌畫得一般咗啲,或者我睇過溫瑞安原著小說,腦子裡已經建構咗元十三限嘅無敵英雄形象,家陣封面畫到佢好平凡,無乜霸氣,感覺嘍囉咗啲。

今期要點有三,一,交代神州奇俠簫秋水同燕狂徒廿年前一戰,忘情天書初試啼聲,打到燕老鬼一仆一碌,大快人心,本來簫秋水可以一嘢KO燕老鬼,但愛才嘅佢留番燕老鬼一命,條件係要燕老鬼效忠朝廷,保家衛國;二,連雲寨寨主戚少商同小石頭試劍,逆水寒惡鬥挽留,平分春色,二人一戰結為朋友,更道出多情種子王小石嘅一招一式皆因失戀自創,廿二歲嘅佢原來已經失戀十五次,所以有十五招絕招,睇黎佢暗戀溫柔,都係預咗自創第十六招居多;三,交代元十三限來歷,佢係上一代四大名捕之一、諸葛先生師弟,因機遇才華武功皆不及師兄,深深不忿,後追求小鏡姑娘,卻誤殺小鏡姑娘老竇智高,小鏡喺佢面前自盡,臨死前仲劃咗佢額頭一刀,自此原名元限嘅佢變得乖戾無常,苦練仇極拳、恨極掌、丹青神腿、傷心小箭等十三種武功,改稱元十三限,整勁個朵,畢生願望以打倒諸葛先生為目標,可悲可憐可嘆。

完全版《群俠傳》卷十五$48

隨書附送白愁飛Postcard一張,個人認為靚過封面。