主頁, 影音新聞, 電影 — 28/09/2014 at 4:30 pm

有片:《天師鬥殭屍》,鬥殭屍定鬥喪屍?

by

4

有理由相信因為麥浚龍套《殭屍》收得,所以先會開拍《天師鬥殭屍》,再望埋監制係王晶,呢個推測就更加八九不離十。此片動作、香艷、鬼怪加搞笑元素俱備,都係將中國殭屍、西方吸血殭屍甚至喪屍撈埋一碟之作,王晶出品,係咁上下喇。

睇完呢條《天師鬥殭屍》預告短片,第一感覺係非常之三不像,雖然有中國天師呢個鐵膽角色,但對付嘅又唔似傳統著清朝服飾嘅中國殭屍,殭屍劈大口,有兩隻尖尖獠牙嘅,係唔係治緊西方吸血殭屍呀?搞搞吓,喂?唔係啩,阿天師仲會俾成班喪屍圍攻,桃木劍加穿心釘又打唔打得贏Zombie呀?唔敢話九唔搭八,但非常之亂晒籠卻係事實。
故事方面,成個古仔圍住周太公嘅「九陰聚財穴」而講,此穴能夠吸盡四方財氣,富及三代子孫,第四代子孫AKTV老板周阿強(關楚耀飾)知悉,為保靈穴,威迫古惑仔烏蠅(鄭中基飾)同奶油豬(伍允龍飾)出手,要玄學大師蔣天機(元彪飾)移棺……故事發展落去,當然係周太公變成甚麼殭屍王,率領一眾唔知殭屍定喪屍兵團同蔣天機大鬥法,而最後,根據八九十年代港產殭屍片定律,又當然係邪不能勝正喇。時間多的話,呢套戲都值得一睇嘅。(10月16日上映)

劇照──

3

 

3

 

2

 

1