fbpx
Online Game, PS3, Xbox360, 主頁, 專題熱話, 遊戲新聞 — 13/08/2012 at 10:25 pm

搶先開機 6分鐘影片《Sleeping Dogs》爆粗炒車去廁所

by

遊戲今日已經偷跑見街,買咗就梗係開機自己玩啦!但訂咗未攞或者未得閒玩再或者諗緊買唔買,就可以睇吓呢段GameoverHK嘅試玩片。為免劇透,試玩片只係遊戲開頭嘅任務,不過都可以睇到主角換衫、揸住架Hiace撞死人、喺屋企去廁所等等場面,爆粗就梗係有啦,原來除咗蠱惑仔之外,香港一般市民都好爛口,仲有,Edison配音嘅Jackie Ma一出場就俾人X,為咗溝女又俾人打,爆粗都冇用。人類,總要重複同樣的錯誤……

打開遊戲,首先會有一張DLC下載碼,係下載遊戲送嘅三個DLC,之後仲會有另一張紙嘅下載碼,就係香港獨佔嘅DLC下載碼,合共四個DLC。不過試玩之時DLC未可下載,試唔到。開機玩第一件事,記得set咗字幕語言嗰度係英文先,如果唔係就淨係角色講廣東話嗰陣先會有英文字幕。入game喇!一開始會有一段未見過嘅警察中心對話,連看更管理員都兇人話:「你知唔知我係邊個呀?」都幾搞笑……之後先會去之前有試玩片嘅追逐場面。玩完呢個stage,就喺監倉見到大家好期待嘅Jackie Ma出場喇!一嚟即刻爆句粗先:「唔X係嘛!」之後就嚟個美式握手……遊戲喺呢個劇情後就好自由,先係主角屋企,可以換衫,著條孖煙囱出街都得,夠晒奔放,仲有就係可以入廁所小便,雖然唔知有咩用……

留意係喺街度會見到唔同嘅拜神點,有盞燈閃閃吓可以俾你埋去上香鞠多三個躬,拜得神多就有能力可以升level,記得神心啲。仲有可以去停車場攞車,暫時只係得一部殘殘哋嘅電單車,而且架車仲可以時空轉移,無論去到邊個停車場都可以攞到車o架!講到揸車呢,係可以通街剷上行人路撞人嘅,不過好快就會有警察出嚟追捕你,仲有要留意嘅係一般警察都跑得快過你……隨街買嘢食嘢都冇問題,喺街撞到路人會俾人鬧「盲X」,仲有唔可老脾嘅會話:「打到你豬頭咁吖嗱……」

動作場面,開頭打架都會有連續技教學,按攻擊掣嘅時間長短就會影響出拳力度,兩輕一重到四輕一重都有唔同連續技,隨住遊戲發展先可以跟師傅學更多唔同招數。要留意嘅係要善用三角反擊掣,敵人身體變紅色就按三角,就可以睇你儲咗幾多能源而決定反擊嘅力量。仲有,按圓形掣捉人去四周發紅光嘅地方按X掣,就可以利用環境陳設嚟使出血腥必殺技……

httpvh://www.youtube.com/watch?v=yeznC36ML8U