Online Game, PS3, Xbox360, 主頁, 專題熱話, 遊戲新聞 — 12/08/2012 at 5:54 pm

《Sleeping Dogs》倒數兩日 搶先專訪製作人

by

仲有兩日先出!GameoverHK巡過舖都暫時未有偷跑,真係搞到個人好忐忑!被稱為港版《GTA》,又俾機迷拎嚟同《人中之龍》比較……到底將會喺後日正式推出、以香港為背景嘅黑道動作遊戲《Sleeping Dogs》製作人點睇?佢又識唔識配音嘅陳冠希?識唔識講番兩句中文粗口?有冇同浩南或者黑骨棠傾過計攞過料?由Sony Computer Entertainment Hong Kong Limited (SCEH)安排,GameoverHK同遊戲製作人Feargus Carroll嚟咗個越洋專訪,未打機先興奮!

順便預告,GameoverHK已經有game喺手,初步玩過幾多廣東話,同埋過咗第一關之後,已經可以四圍走,玩法好自由!好快就會出開機試玩片,記得昅實。


GameoverHK:遊戲中嘅粗口你哋明唔明咩意思?製作完隻遊戲之後,有冇學番兩句中文粗口傍身?
Feargus Carroll:我唔明,都冇學到講廣東話粗口。不過,我成日喺夜晚進行遊戲優化程序時聽到同一句粗口……

GameoverHK:香港班網友成日話香港班蠱惑仔冇遊戲入面啲黑社會咁大隻,多數瘦蜢蜢,你點睇?
Feargus Carroll:每一個地方嘅人都會有高矮肥瘦,包括罪犯。
GameoverHK:係喎,陳冠希配嗰個Jacky Ma都算瘦蜢蜢吖。

GameoverHK:街景出現嘅招牌有咩「低到爛時裝」、「竹星麻雀館」呢啲中文招牌,香港人睇到得啖笑,其實你哋明唔明點解?
Feargus Carroll:我自己就唔明,不過我哋製作團隊入面有嚟自香港嘅人,我諗佢哋知點解,可能佢哋諗住玩嘢搞吓笑啦。

GameoverHK:香港玩家好期待呢款遊戲,但外國玩家又點睇呢隻以香港為背景嘅遊戲?
Feargus Carroll:以我哋所知,好多外國玩家都好期待以美國以外地方或東方城市為背景嘅開放世界遊戲。

GameoverHK:製作團隊有冇嚟香港做資料搜集?有冇搵香港嘅黑社會成員提供資訊?
Feargus Carroll:有,我哋嚟過香港幾次,影咗超過20,000張相,仲拍咗幾個鐘嘅影片。我哋仲有同一啲前黑社會成員見過面,而且仲有搵前警方反黑組嘅探員搜集過資料。

GameoverHK:點解遊戲裏面個地圖都唔跟足香港?
Feargus Carroll:製作遊戲地圖時,我哋要取得多方面嘅平衡,技術上亦有限制,不過我哋都盡量顧及真實性。雖然遊戲入面嘅地區分佈同真實有分別,不過我哋已經將呢個世上其中一個最美好城市嘅特色,呈現喺大家眼前。

GameoverHK:點解搵陳冠希配音?
Feargus Carroll:我哋都係Edison作品嘅fans呀!(吖喂!咁啱?我都好欣賞Edison某啲作品喎……)而且佢表現好好呀,佢捉到遊戲角色嘅神髓,即係佢配嘅Jackie,咪就係大英雄側邊,識於微時嗰隻朋友同伙伴囉。

GameoverHK:好多玩家都拎《Sleeping Dogs》同SEGA隻《人中之龍》比較,你哋覺得點?
Feargus Carroll:每隻新遊戲都會令玩家諗起另一啲玩過嘅遊戲,就好似電影、書籍、音樂呢啲創作都會咁。《Sleeping Dogs》集合連續技動作、射擊、飛車賽車同超強嘅故事內容,呢啲都可以令隻遊戲更加獨一無二。

GameoverHK:咁同《GTA》又點比?
Feargus Carroll:《GTA》係最大嘅開放世界遊戲,所以當然會有人拎其他遊戲同佢比較。但係我哋就冇諗住要同佢比,我哋只係製作好自己嘅遊戲,有共通之處亦都無可避免。不過,《Sleeping Dogs》會集中喺利用四周環境作武器,配合射擊同自由走動呢啲原素,我相信呢隻會係一隻好強勁、集合多種玩法嘅開放世界遊戲。

GameoverHK:點解會揀香港做背景?
Feargus Carroll:有好多因素令我哋選擇以香港為背景。香港電影好成功,如果主角係呢個城市入面嘅人,會令我哋覺得好有趣。而且香港係一個好靚嘅城市,有藝術文化氣息,又係高科技同傳統感覺嘅融和之地,呢個東西文化匯聚嘅地方好吸引我哋。