主頁, 動漫資訊, 潮玩新聞 — 13/08/2014 at 9:15 pm

輕量級複製道《火武耀揚》幾個門生同一面相

by
幾個門生同一面相,唔通七月又十四?
幾個門生同一面相,唔通七月又十四?

瑞新每周都賺我三十蚊,捧場心態係睇佢點扭橋,畫功就一向都無太大期望。同一個面相表情,加減鬍鬚疤痕、改髮型髮色、改眉毛粗幼、加減飾物耳環等等,就可以無限複製出十個八個唔同角色嘅相頭,原本睇慣晒都無乜好嘈,但今期《火武耀揚》實在離譜,同一格內幾個門生居然有同一面相,唔係咁嘛?

今期第773期《火武耀揚》第22至23頁雙跨頁,講華興會一眾大佬浩浩蕩蕩拜阿公山,墳頭前誠心上香,祈求先賢列祖保佑雷公同黑骨棠,可以打敗葉知秋同金剛奪雙坐館之位,呢一格公仔詭異在出現咗幾個一模一樣嘅門生,除咗髮型唔同,五官表情完全相同。點講好呢?話佢係無敵影印道咩,講真又影印唔晒,但實情又真係偷工減料,或者呢種Dub法可以稱之為「輕量級複製道」,懶咗啲囉。真心Mode,瑞新講古仔係幾高潮迭起嘅,但負責繪圖班手足真係要加把勁囉,話明公仔書嘛,公仔就梗係要一筆一筆畫出嚟,唔應該太倚賴電腦無限Dub囉。

第773期《火武耀揚》
第773期《火武耀揚》