PS3, PS4, Xbox One, Xbox360, 主頁, 專題熱話, 遊戲新聞 — 12/08/2014 at 1:27 pm

生化之父 三上真司專訪 《The Evil Within》 「玩完唔敢去廁所。」

by

當年,第一次玩《Biohazard》,播完片頭真人片,進入遊戲之後嘅氣氛,真係涼浸浸……製作人三上真司最新作《The Evil Within》10月推出,仲有中文版,睇預告片,絕對可以搵番嗰種寒住玩嘅驚嚇感,亦都重新感受到三上真司先生製作驚嚇遊戲嘅功力。訪問中三上先生態度開放,可以話有問必答,好似睇緊《The Walking Dead》,自己本身驚鬼,想令玩家搵番細個睇完鬼片唔敢去廁所嘅感覺,仲有向舊作致敬嘅場面……全部都答得精警。佢仲有嘢同香港玩家講添!

DSC_6936

GameoverHK:遊戲入面嘅敵人係鬼魂?有超能力嘅人?定一話係怪物?
三上真司:如果透露太多就會劇透,因為呢個係遊戲嘅主要內容。不過可以話俾你聽,唔係呢3樣嘢。

GameoverHK:之前睇過遊戲片段,遊戲難度好高?
三上真司:係,因為作為生存遊戲,當然要提高遊戲難度,否則就唔可以叫生存遊戲喇。

GameoverHK:今次遊戲係咪會集中喺一間大屋入面?
三上真司:遊戲會分唔同嘅關卡,玩完就會知道個概念。

GameoverHK:今次個氣氛好似第1集《Biohazard》,而預告片中都有一幕係敵人角色擰轉頭,好有《Biohazard》經典一幕嘅感覺,係咪專登咁做?
三上真司:今次遊戲嘅整體會有啲《Biohazard》第1至4集嘅感覺,而當中有啲恐怖、驚嚇情節會用番落去,係專登咁做嘅。

GameoverHK:係咪需要睇好多恐佈電影攞靈感?有邊啲印象好深?
三上真司:都會睇唔同嘅電影攞靈感,近排睇緊嘅會係《The Walking Dead》電視劇。

GameoverHK:本身驚唔驚鬼?你係一個細膽還是大膽嘅人?
三上真司:個人覺得鬼都係恐怖嘅嘢嚟,但覺得平時係唔會遇到,只係有啲位會突然想起。即係好似細個睇完恐怖片唔敢去廁所一樣。

GameoverHK:大膽嘅人製作恐怖遊戲會好啲?
三上真司:相反,咩都唔驚嘅人,做唔到恐怖遊戲。我覺得大膽嘅人咩都唔驚,唔會知道邊啲位可以嚇到玩家。反而細膽嘅人製作恐怖遊戲效果會更好。

GameoverHK:點樣去製作一啲玩家一定會驚嘅驚嚇位?
三上真司:我覺得如果只靠影像同音效去嚇人係唔夠,作為驚嚇遊戲,應該係要令玩家拎住個手掣玩緊時都會緊張到手心冒汗,但又唔捨得放低手掣。

GameoverHK:第一次製作PS4遊戲,感覺係點?
三上真司:感覺係空間大咗,可以做嘅嘢多咗,所以自己嘅工作量都大咗……

GameoverHK:係咪第一次嚟香港?感覺係點?有咩同香港玩家講?
三上真司:我今日一落機就嚟咗動漫節會場,只可以講……香港嘅夜景好靚(指住窗外景色)。我想同香港嘅玩家講,今次係我第一次有遊戲中文化,我相信用番自己用開嘅語言嚟玩,驚嚇同投入程度都會更高,希望大家會鍾意。

 

DSC_6891 DSC_6894 DSC_6900 DSC_6902 DSC_6923 DSC_6929 DSC_6934