主頁, 影音新聞, 電影 — 21/07/2014 at 10:00 am

有片:2014巴西世界盃撲救重溫

by

a

過咗個幾禮拜,都仲有人講緊世界盃,除咗死拗爛拗邊球係金球外,邊球係最佳撲救都係話題之一。如果你都想拗埋一份,咁呢條2014世界盃撲救合輯一定要睇,而我呢,就認為德國紐亞係世界第一。

神神化化嘅尼日利亞Hea爆門神安耶馬、俾人射到一仆一碌嘅美國門將候活、個樣勁似吳鎮宇嘅墨西哥守門員奧祖亞、淡定有錢剩嘅意大利鋼門保方,真係個個都身手不俗。啲人成日話弱隊出龍門,我就話強隊一樣有好龍門,大家不妨Recall番德國紐亞嘅表現,屢救險球固然係勁,連大腳開龍門球、用手直接拋波畀隊友組織攻勢、做埋Last guard化解對手進攻,有身手有腳法之餘,嗰份冷靜先最恐怖,君不見八強德法大戰,賽事末段法國賓斯馬嘅窄位施射,又快又急又有角度,紐亞求其舉起右手就將射球封截,呢下近乎貓嘅快捷反應先至係世界級。至於我愛隊英格蘭,Sorry,無睇錯的話,喺呢條片裡面無赫特存在,唉。