fbpx
主頁, 動漫資訊, 潮玩新聞 — 01/08/2012 at 2:00 pm

星光大道下的王小虎著Leggings?

by

王小虎

黃興豬戥《刀劍笑》未能入圍不值、馮志明話唔抹殺所有入圍單位對港漫嘅貢獻、余兒為《吾命騎士》明明有份但Last被飛出局深深不忿,點都好啦,雖然「香港漫畫星光大道」被批評為小圈子玩意,但塵埃落定係事實,依家要關注嘅,應該係將來戙企喺星光大道嘅各漫畫人物雕塑,究竟質素如何。

大家蒲動漫節,有無發覺場內已經擺咗四座「香港漫畫星光大道」​精裝別注版彩繪雕塑呢?吓?行過都唔覺?唔係嘛?直頭無留意?又難怪嘅,因為呢四座嘢實在做得好膠吓。膠有兩個意義,一,塑膠個膠,雖然唔知係唔係真係用塑膠做,但膠味著實好重,老實,我無摸過,齋望相啫,但嗰種質感,真係同戙企M記門口嘅麥當奴叔叔無乜分別;二,戇膠膠個膠,面相怪怪哋,硬係覺得一眾主角好似老外咁,好戇膠!咁大個機構有咁多人力物力,唔係搞壇咁嘅嘢算數呀?我Expect至少都有個銅像睇吓添。

逐個評,最順眼係牛仔,因為漫畫人物本身線條簡單,變相好易整,如果咁都整得差,就真係無嘢好;步驚雲姿勢唔錯,但面相做到有啲似石黑龍,頭髮點解唔做番黑色呢?頭髮本身亦做得唔夠長;華英雄面相最似老外,套功夫衫亦做唔出飄逸感,似落雨濕咗水趕唔切換衫多啲;最最最最攞命係我最愛的王小虎,我知Nike眉係王小虎特色,但都唔使粗到同隻眼一樣大吖,胸肌又做得唔夠挺,六舊腹肌做到好似雞蛋仔個Friend格仔餅咁,真係好肉酸吓,最頂佢唔順係著埋條貼身長褲,仲要係姣婆紫色,嘩,救命呀,唔知仲以為小虎著咗Leggings,好嘔呀大佬!

香港漫畫星光大道:https://www.facebook.com/pages/%E9%A6%99%E6%B8%AF%E6%BC%AB%E7%95%AB%E6%98%9F%E5%85%89%E5%A4%A7%E9%81%93/101829173289655

牛仔

步驚雲