fbpx
主頁, 動漫資訊, 潮玩新聞 — 01/08/2012 at 12:00 pm

馬榮成摺埋《天下》?

by

喺剛過去嘅書展,馬榮成聯同黃洋達、項明生同天航出席「小說x跨媒體座談會」,一齊接受文雋訪問,席間透露將會完結連載咗廿幾年嘅《天下》。馬Sir親口對傳媒話:「……寫作係人生嘅一個過程,任何過程都有起有落……我哋做一本漫畫,付出好多時間,唔單止創作,仲有好多好多製作喺裡面,每個星期,我到依家都仲係,唔會有好多私人時間……如果可以停一停,咁對於人生同埋創作,都係一個層次……」甚麼「人生」又甚麼「層次」,老實講有啲唔明馬Sir講乜,不過聽到呢個消息,我起初想拍手掌,但確又有啲唔捨得。 我反應係咁,香港討論區班C-Hing又點反應?大家一齊睇睇留言──

──「唔洗等瘋暈完,自己早放棄了。」(唔使等馬Sir摺書,老早死心放棄!)

──「就黎?咁即係幾耐呀?十年八年嗎?」(唔信馬Sir會完咗本書!)

──「現今市道,完了是好事,反正無人買了。」(悲觀主義者!)

──「再未來20年啦!出多30本外傳、前傳、後傳先啦,唔搾乾啲死士,點買到多幾間豪宅呀?」(死唔信馬Sir會放棄呢棵搖錢樹!)

──「驚佢在《風雲》完後會玩嘢出風雲前傳和外傳。死都唔肯斷氣,繼續呃錢!」(幫馬Sir諗埋後路添!)

雖然,好多港漫迷都好唔妥《天下》個爛古仔、好唔妥點解絕心跌幾廿次山崖都死唔去、好唔妥點解玩來玩去都係聶風同步驚雲、好唔妥無限重複東瀛侵華呢條玩過N咁多次嘅老土橋……雖然好多好唔妥,但我相信,如果有朝一日真係無《天下》睇,我諗好多港漫迷都會若有所失,尤其係鬧得最勁嗰班。

睇片:

httpvh://www.youtube.com/watch?v=oroo8YX-cgo&feature=youtu.be