主頁, 偶像資訊, 動漫資訊, 潮玩新聞 — 13/07/2014 at 10:00 pm

東英五虎收皮 《古惑仔》展開全新一輯故事

by

5

《古惑仔》之天滅東英一Part故事正式完結,結局係東英五虎四死一退隱,比起洪興八大壯士死其六嘅福田一役,呢Part戲無論劇力、張力、感染力同畫面表達能力都稍遜一皮,希望牛佬下一Part故事會好啲喇。

東英五虎下場──先有吼天虎四海喺大陸受靶收皮,繼而山東虎于八俾羅心左偷襲致死,之後胭脂虎謝佩芝俾殺手買起,南亞虎受重傷陳浩南放佢一馬,淨番最後一隻白老虎羅心左喺剛剛第1729期亦俾梁小東近身林笑風監生打死,仲死得好樣衰添,簡直大快人心。唔知點解,個人認為羅心左呢個角色係幾失敗嘅,一,造型太似太乙;二,得把口無壇好戲做過;三,重口味、騎呢,黐埋亞皓、亞歷士、打令同櫻姑四條女已經夠傻,老竇四海屍骨未寒就同謝佩芝做愛呢下先最最不孝;四,頭腦簡單以為可以食滑古惑倫、飛仔平同世英等前輩,結果咪落得過死唔眼閉嘅下場囉。
聽朝有新一期《古惑仔》出,新一輯故事,無記錯嘅話,牛佬透露過要死一至兩件「神人級」角式,之前鋪排咗地中海街角偶遇陳浩南一幕,唔通死嘅係地中海?個人認為佢都係時候打柴,佢同洪興實在太大仇口嘞,希望佢嘅死,可以替近期《古惑仔》嘅沉悶故事,製造到另一個高潮位喇。

 

4

3

2

1