fbpx
主頁, 專題熱話, 潮玩新聞, 玩具資訊 — 30/07/2012 at 7:32 am

動漫節現場(二) Hot Toys篇 蝙蝠機現真身!

by

嗱,先旨聲明,我冇收錢冇廣告冇誇大,但真係不得不讚,今年動漫節Hot Toys攤位的確係有睇頭有人流。先講有咩睇,1/6 Batwing蝙蝠機現真身,超巨型,長闊高加埋有四個生果紙箱砌埋咁大!仲有之前報導過嘅Hulk啦,大大隻相當唔錯。仲有Catwoman、1/4蝙蝠俠、未來戰士,仲有令70後無限懷念嘅《鐵甲威龍Robotcop》,睇白件都覺得勁!

講到佈置,蝙蝠俠情景有燈之餘,仲有風喺坑渠吹出嚟,超有心思;復仇者嗰邊就識噴煙,搞到幫手影相嘅苦茶影極都影唔清隻Hulk!攤位方面,有兩隻超巨型變型俠醫手壁打爆牆伸出嚟,又有巨型雷神個搥黐喺牆,絕對係合照景點!講到人流,雖然已經劃出勁大空間俾訂嘢同攞貨嘅fans排隊,但齋入去睇展品嘅區域都迫到爆,個個拎部手機相機出嚟,唔講以為放咗林峰入啲玻璃櫃呀!最後我都係嗰句,無論你美國英雄迷定本地玩具迷,Hot Toys今次個攤位,絕對值得迫入去睇!