fbpx
主頁, 專題熱話 — 25/07/2012 at 3:05 am

2012動漫節漫人協會精品攻略

by

除玉皇朝同天下外,漫人協會算係今年動漫節第三勢力,搞手興豬同老馮矢志復出畫壇,希望食住今年動漫節個勢建立地盤。望望精品,食老本就少不免架啦……但總算老馮有誠意,無話求求其其翻印舊畫舊相撈一筆,推出嘅水晶畫板、Postcard同海報,大部份都係重新畫過嘅。興豬仲拉攏埋栢迪、福龍同上官小寶出手,一齊幫拖搞旺個市,連一漫年嘅《九龍城寨》、《群俠傳》同《吾命騎士》都搭單同一個F15攤位有售,變相借埋司徒劍橋個朵玩一鋪勁,希望眾志成城呢招Work啦。

主打必買有《刀劍笑經典全集》,初頭都有啲Confused,以為將昔日全套《刀劍笑》薄裝單行本輯錄成書,睇真先知原來唔係,輯錄就係輯錄嘞,不過係輯錄番1至386期《刀劍笑》嘅封面咁解啫。《刀劍笑經典全集》分三個版本,分別係橫刀版、名劍版同笑三少版,每本原價$160,現場一次過買齊全套三個版本Total $450,慳三條草再送三張Postcard同三張海報,感覺真係抵好多,呢四舊幾水畀得過。

隨購買全套三個版本《刀劍笑經典全集》。

隨購買全套三個版本《刀劍笑經典全集》送的第二款海報。

隨購買全套三個版本《刀劍笑經典全集》送的其中一張Postcard。

雖然唔少C-Hing話今年勁Hit嘅水晶畫板呃錢,但望過四大水晶畫板,又真係好難忍得住唔買,無計,老馮自創嘅沙筆畫法真係好有霸氣,係型就係型,無得好講!分橫刀、名劍、笑三笑同狄無花四個版本,各36×19吋,各附水晶證書咭,各限量1至30號,老馮仲會畫埋隻龜送畀你,每張$690。四揀一的話,我會揀名劍版,大紅色調盡顯名劍入魔後一身邪氣,我Like。

橫刀水晶畫板$690

 

名劍水晶畫板$690

狄無花水晶畫板$690

嫌接近七舊水一張水晶畫板貴?不妨考慮買李小龍系列水晶畫板,全套五張$500,今劑請埋福龍伏義出手,客串畫上官小寶名著《李小龍》主角李小龍、九紋龍、沙膽仔同金魔鬼。入場購買有嘢醒,即送Postcard三張,五舊水有Total八件嘢喺手,自我感覺良好好多。

李小龍系列水晶畫板(李小龍一)

李小龍系列水晶畫板(九紋龍)

李小龍系列水晶畫板(金魔鬼)

李小龍系列水晶畫板(沙膽仔)

李小龍系列水晶畫板(李小龍二)

唔知幾時開始,動漫節精品一定有Tee份,個人認為Tee呢類掛得上身嘅所謂精品非常難收藏,摺埋又煩,諗位擺又阻碇,著出街又唔捨得,所以通常我都會望一望就算。不過呢件刀劍笑黑潮Tee唔同,因為一,圖案由老馮重新繪畫,絕非用舊畫Print上Tee咁無誠意;二,黑色有型有格,真係稍稍稱得上個「潮」字;三,價錢唔貴,一套三件$450,分別係名劍出鞘、笑傲江湖同橫刀奪愛,現場購買即刀劍笑Postcard五張,抵上加抵,我考慮買。

刀劍笑黑潮Tee一套三件$450

值得一提嘅係,漫人協會所屬攤位會分展覽區同銷售區兩部份,入貨唔使講梗係去銷售區啦,咁展覽區又展覽啲乜呢?會將多位漫畫家嘅原畫同手稿盡現眼前,兼公開七八十年代珍藏舊書同漫畫報。我屬七十後,見番呢啲舊作肯定特別有那些年感覺,八九十後唔識都唔緊要,儘管望望,絕對值得你見識見識,我話嘅。

《李小龍》鷹王破日封面原稿,上官小寶親筆畫,七十年代經典之作。