主頁, 動漫資訊, 潮玩新聞 — 22/07/2012 at 1:15 pm

葉明發《風流》創刊,大黃封面破格!

by

《風流》創號刊$68

葉明發《風流》擒日見街,第一個感覺係──好貴!賣$68,隨書送「魔鬼的羽翼」迷你手槍一把,雖然槍身花紋做得好細緻,金屬感好重,仲要做埋個槍托,但老實真係好貴,買o個陣,我有猶豫過。
第二個感覺係──搞笑,全因相熟書報攤老闆娘一段話:「封面包膠袋連埋個死人盒,『牙牙搾搾』頂住晒o的位,真係麻鬼煩,好彩都算去書去得快。」唔知佢入貨幾多啦,但賣剩三本係不爭事實。第三個感覺係──封面好破格,用類似毛筆筆觸勾勒主角做封面,大黃Shocking yellow,記憶中無港漫封面試過淨係用單一隻色,偏偏又真係好鬼死搶眼,馬榮成你係得o既。揭開,上官小寶有份幫手寫創刊詞,小弟七十後,真係唔知《風流》係三十幾年前馬Sir舊作,文章提及「《風流》面世之初,已是三十多年前的事……當其時,大部份人都不相信《風流》的作者是香港人,還以為是日本的成名漫畫家所繪,更遑論相成馬榮成只有十七歲左右。」原來咁巴閉,失敬失敬!
家陣搵葉明發重畫,我當新書咁睇,不得不講句畫功好出色,細細格好襟睇,一貫天下出品o既精雕細琢。去橋亦好緊湊,幾頁紙就交代到成個故事架構,殺手組織「零」高手如雲,殺手高飛、聶少騰同任生各有實力,最估佢唔到係李真希呢個角色,以黑社會頭子情婦出場,實情原來佢都係殺手,仲話佢o既出現代表一場「殺手的新陳代謝」,「零」組織希望殺手們自相殘殺云云,越睇越有小說味。要評分,我畀95分,扣o個5分,係因為把槍,實在太貴呀馬Sir。

隨書附送手槍一把,係幾型o既,不過真係貴o左o的o羅。