主頁, 偶像資訊, 動漫資訊, 潮玩新聞 — 28/05/2014 at 2:00 pm

《同伴》創刊,熱血、友情再加……公義?

by

qqq

唔講咁多,先投訴發行,曹志豪《同伴》前日已經創刊,因乜解究去到今日油塘先有書?搞到我遲兩日先出到呢條News,大渡真係要正視呢個問題。入正題,呢本新作我畀95分,因為除咗熱血同友情之外,如果無睇錯的話,我仲隱隱然睇到公義。

同樣係黑社會題材,個人認為《同伴》比其他江湖書較寫實,鳳仙喺波樓揼人雞坤錢、火山有理無理打咗先講、小飛夾Band遇保安驅趕、朗哥身為大佬都有煩惱,凡此種種都貼近番現實,似番真正古惑仔所為,又好揪如杜男,俾九三友圍攻都會先落下風,無話一拳打爆牆、一腳撐爆肚、又空翻又一跳可以跳上二樓咁誇張。點解我話隱隱然睇到公義呢?創刊號條大橋好簡單,講朗哥身為黑社會分子,都寧願有錢唔賺,誓死力抗地產霸權,唔畀人剷平安樂村;又,小飛喺公家地方夾Band,卻俾附近商舖保安驅趕,幸得火山出手相救,呢兩段情節係唔係好熟口熟面?無錯,依家香港社會就係咁,一味向錢看,公義蕩然無存,曹志豪擺明玩影射,我Like呀。至於扣嗰5分,全因此書唔夠墜手,以每本$35計,頁數似乎少咗啲噃,希望曹志豪可以畫多十頁八頁益吓讀者喇。