fbpx
Online Game, PS3, Xbox360, 主頁, 專題熱話, 遊戲新聞 — 21/07/2012 at 12:10 pm

搶先試玩片段 港版GTA《Sleep Dogs》 大佬怒X陳冠希

by

嘩!香港人幫Square Enix隻大game配音呀!本來,呢件係一個賣點。可惜,配音嗰個叫陳冠希……嗱,不如我哋換個角度諗吓吖,佢喺遊戲入面做古惑仔Jackie Ma,一出場就俾大佬X佢冇料到,唯有死死地氣答:「真係乜都冇。」而且喺遊戲裏面,主角可以見人就打,就算係一般市民都可以打到爆缸,咁……我係咪可以打鑊佢?GameoverHK率先試玩到呢隻遊戲嘅金碟,即時體驗遊戲除咗廣東話粗口同以香港做背景外有咩好玩之處。

呢隻Square Enix嘅《Sleeping Dogs》已定於8月14日推出PS3、Xbox360及PC版本。有港版GTA之稱,之前E3已經有得試玩過,而今次就嚟到香港,傳媒可以親身體驗兩個任務,先就係追捕一個光頭古蠱仔,沿途經過疑似廟街嘅街邊檔,可以食碗麵又可以食串燒,不過我就未試過喺街邊拮魚蛋時個老闆會同我講:「多謝晒,Thank you for shopping here.」真係香港好客之道。而喺街度行時,就算係普通市民你都可以埋去打搥佢,佢就會話:「我都有老母o架大佬!」而旁邊市民又會嗌:「出事喇!」、「咁牙煙!」、「撞鬼你呀,撞到人對唔住都冇聲!」相當搞笑。最後上到天台,我終於聽見字正腔圓嘅粗口:「X你老X臭X,Fxxk you吖!」唔,香港人英文水平真係越嚟越高。

操作方面,四方形掣係攻擊,輕按就輕拳,長按就重攻擊,圓形掣就捉住人,捉住之後,畫面就會有地方發紅光,之要捉人埋去按X掣就可以出特別技,例如用冷氣機槽攪爆人個頭,用電箱電到人出煙等等……不過講到肉摶中最有用一招,就係按三角掣反擊,當敵人埋身準備攻擊你時,個身就會發紅光,呢個時候按三角掣,就可以出反擊技,俾人圍時最好駛。

第二個任務,又係搵人。今次就可以試到搶戰,同一般第三身射擊遊戲差唔多,而喺某啲場位竟然可以好似《Max Payne 3》咁出慢動作,啲古蠱仔今次又有新嘢講:「知唔知咩叫眼前一黑?」都唔知佢講乜……最後,就係脅持目標人物,用目標人物做人肉盾牌,不過,如果佢幫你擋得太多子彈死咗,一樣會Game Over,咁,做咩要搵佢擋子彈?係咪有啲無聊……

整體嚟講,香港場景都係外國人眼中嘅香港,地圖方面亦唔係跟足香港地形,不過一路打一路聽廣東話就幾搞笑。另外遊戲系列都唔錯,攻擊動作或能力都有得用經驗值升級,加埋未有得試玩嘅飛車同小遊戲,都應該幾爽快幾多嘢玩。

試玩片段
httpvh://www.youtube.com/watch?v=qG7DHoQZT-U

相關報導:

港版GTA《Sleeping Dogs》製作人專訪:「成龍、發哥激發創作!」

陳冠希配音 港版GTA《SLEEPING DOGS》

新片新圖《Sleeping Dogs》有得賭有得蒲