fbpx
主頁, 專題熱話 — 20/07/2012 at 10:01 am

2012動漫節玉皇朝精品攻略二:再搶水晶人形簽名板!

by

上討論區,好多C-Hing都唔多妥近排好Hit嘅甚麼水晶畫板,話求其鑲塊四方透明膠喺面,就動輒賣過百甚至上千,貴到無譜,仲勁插九成係舊畫一張,名為限量生產實情有Order就長賣長有,算有啲誠意出新畫嘞,但都唔係獨一無二親筆畫,大量翻印搞到人有我有,直接導致收藏價值大減。

我咁睇啦,傻嘅都知呢啲甚麼水晶畫板絕非水晶製,透明膠一塊就預咗,畀一條紅衫魚就想買到真水晶?有人肯賣你都唔敢買啦。查實呢塊膠嘅真正用途,係想加強保護幅畫,等幅畫唔會受潮變黃變皺,至於價錢咯喎,都係嗰句啦,精品嘅嘢,你當係寶人哋可以當係草,每人都有唔同價值觀,拗都無謂,加陣又唔係開價一億一張,C-Hing們嘈嘈閉做乜呢?你唔買咪唔買囉,人哋買你都唔使笑人傻仔嘅,Right?

入番正題,今年動漫節玉皇朝都有推出水晶板,都係用舊畫製作,但比較有誠意嘅係塊透明膠並非四四方方咁死板,而係Fit番幅畫形狀剪裁,再加多個附角色名字嘅地台,企得穩穩陣陣,一字排開都幾有氣勢。元祖龍虎群英水晶人形簽名板Boxset同龍虎群英水晶人形簽名板Boxset,如果要我二揀一,我會揀前者,因為好鬼死鍾意《龍虎門》啲舊畫風,Nike眉、大眼睛、兩胸肌加六腹肌、表情咬牙切齒,係極度Old school,但我就係鍾意呢種好好好那些年嘅情懷。

元祖龍虎群英水晶人形簽名板Boxset(通常版)$700

 

水晶人形簽名板背面,跟住角色人物形狀剪裁。

水晶人形簽名板正面,地台有埋角色名字。

鍾意儲靚畫嘅Fans,一定要買火雲邪神創刊原畫再生號,輯錄番創刊號全書所有內容,封面全彩稿,內文就彩稿加黑稿一一奉上,勁在原稿原大Size,拎上手好墜手,加埋超巨型皮面收藏盒,真係唔買都要睇吓。

火雲邪神創刊原畫再生號$2000

《火雲邪神》創號刊封面彩稿,依家睇番都仲係覺得好有氣勢。

原大內文彩稿,大大格。

查實眾多精品中,個人認為海報就最難收藏,摺埋又唔係,捲埋放入紙筒又嫌阻碇,不過身邊好多老死都有鋪儲海報癮,所以春秋戰雄133期特別版連紀念海報,九成九係佢哋杯茶。除第133期《春秋戰雄》特別版外,仲包埋第1期、第100期同第1至100期晒冷式封面紀念海報三張,呢一舊水,無得慳。

春秋戰雄第133期特別版連紀念海報$100,圖為第1期封面版本。

春秋戰雄第133期特別版連紀念海報$100,圖為第100期封面版本。

嫌紙一張軟巴巴,實淨啲宗卷又點睇?原圖就只得A3 Size,但套咗入幅畫布裡面,兩邊有卷軸方便對摺捲埋,有新著龍虎門、春秋戰雄同天子傳奇三款珍藏宗卷選擇,擺明用舊相架嘞,但整體感覺好古色古香,都係入貨之選。

天子傳奇珍藏宗卷$200

春秋戰雄珍藏宗卷$200

新著龍虎門珍藏宗卷$200

未必係最值得珍藏,但Tee同Bag一定「必須」珍藏,唔係咩?一來,Tee同Bag著得多揹得多會變殘變舊,你未必捨得著同揹;二來,斷估你都唔會著住件鐵木真Tee或揹住個王小虎肩袋周街行,我諗好毒好毒嘅宅男先會咁做囉。 黃玉郎都幾睇好《蒼天霸皇》,動漫節出Tee都有鐵木真份,彩色燙畫T恤有王小虎、石黑龍、王小龍、春秋戰雄同蒼天霸皇五款選擇,前三款白底,後兩款黑底,圖案印得好出,手工一啲都唔曳。至於變形Shoulder Bag,就有王小虎、石黑龍同王小龍三款選擇,可摺成一個小型手提包,幾盞鬼!

王小虎彩色燙畫T恤$250

石黑龍彩色燙畫T恤$250

王小龍彩色燙畫T恤$250

蒼天霸皇彩色燙畫T恤250

春秋戰雄彩色燙畫T恤250

王小龍變形Shoulder bag $200,背面。

正面

可摺成小型手提包,好變形金剛Feel。