fbpx
主頁, 動漫資訊, 潮玩新聞 — 15/07/2012 at 3:39 pm

《鐵將縱橫》水晶畫報開賣!

by

係漫畫迷都知邱福龍手畫有幾掂,今期《鐵將縱橫》,佢特登花整整一頁紙幫自己嘅限定紀念水晶畫版宣傳,齋睇相已經覺得好正,不過相始終係相,正極都係2D,點都唔及真正3D摸上手咁震撼。

擒日我又落「188收藏家漫畫精品店」,Sales哥哥又再笑口噬噬出迎。親手摸過完成品,用眼睛真正Scan過,嘩嘩聲過後,我發覺「正」、「靚」、「掂」、「勁」等膚淺字眼已經不足以形容,我份人比較浮誇,會用「藝術品」三個字形容呢五幅水晶畫報。
先數「麒麟‧悟」,用色深沉,鐵縱橫低頭閉目若有所思,側邊把麒麟寶劍畫得好精細;再來有「麒麟‧決」,赤殺王不怒而威,表情滿肚密圈。「#0創刊零號」同「#1赤破牢」都係跨版大推頭作品,前者藍調後者紅調,人物角色勁多,但又唔會搶過主角鋒頭,要讚。個人就最鍾意「#15西方秘境」,赤殺王持劍怒劈,畫到好狂野。呢五幅水晶畫報大家都睇過廣告相,無謂Double再登,我反而影咗附送嘅親筆簽名證書畀大家睇睇,證書其實係各畫報之迷你草圖版,好Raw,未完全著色,欣賞福龍獨有筆觸嘅Fans必儲。另外,買齊五幅海報,即送「《鐵將縱橫》赤殺王水晶立體畫」,呢幅畫勁咯,麒麟寶劍誇張到可以喺張畫裡面拎出嚟,好睇又好玩,最重要係,有錢都買唔到先至夠矜貴。

188收藏家漫畫精品店
地址:旺角信和中心一樓137舖
電話:6331 7833

《鐵將縱橫》麒麟‧悟限定紀念水晶畫報$250。(此圖為證書)

 

《鐵將縱橫》麒麟‧決限定紀念水晶畫報$250。(此圖為證書)

 

《鐵將縱橫》0#創刊零號限定紀念水晶畫報$880。(此圖為證書)

 

《鐵將縱橫》#1赤破牢限定紀念水晶畫報$880。(此圖為證書)

 

《鐵將縱橫》#15西方秘境限定紀念水晶畫報$880。(此圖為證書)

 

買齊上述五幅水晶畫報,即送《鐵將縱橫》赤殺王水晶立體畫。