fbpx
主頁, 其他, 動畫, 影音新聞, 硬件資訊, 電腦新聞 — 12/07/2012 at 2:18 pm

Wacom 24HD touch 屋企開PIXAL

by

 

物慾無窮!不過小弟好窮!當我仲用緊24″ Cheap芒打緊稿之際,Wacom話俾我知呢個世界有一塊24″、Full HD、多點觸控、10.7 億色、涵蓋 97% AdobeRGB色域、RGB LED 背光……嘅Wacom 24HD touch「畫板」!

開價3,699,唔貴!不過係美金,所以係好狠貴,大概$29,000港紙,如果係冥通我就俾得起;睇片,左手用Multi-touch功能,不斷將畫面方大縮細圖像,右手執畫筆,喺畫板上畫畫畫,如果俾我有一塊,就算我畫公仔係九流,我都會完全幻想自己喺PIXAL返緊工(左手渣筆嘅唔好挑戰我!我完全在思想自瀆中,殺人0架!)。

畫板四邊,照舊有好方便0既PS HOT Keys、你仲可以90度打直佢做芒,至完全放平、爬起寫字枱畫公仔變馬榮成!

香港傳媒今日收到記招邀請,嚟緊18號星期三有記招,真係唔買我都要摸下;由於佢推出之後,係暫時Wacom最高階畫板,所以特別請咗插畫及動畫大師Mr. Akin Vong、時裝設計新星Ms. Lilian Kan、人氣插畫漫畫家Mr. Cuson Lo,同專業攝影及數碼修圖師Ms. Toby Wong做示範,估死佢都喺即場畫畫畫,甚至畫張Q版「記者」公仔頭討好記者!妖!係就豪啲,好似某某韓國手機大廠咁,每個到場記者送一部旗艦級手機做「長期測試」;咪先!呢塊24HD touch,可以話係Wacom嚟緊航空母艦級之作,送機機會應該會幾微,都係等Press相算喇!