主頁, 動漫資訊, 潮玩新聞 — 11/07/2012 at 2:00 pm

完全版《群俠傳》卷十二,柳五出賣李沉舟!

by

早兩日完全版《群俠傳》卷十二見街,我呢個老劍迷即時仆落街買番本,之後走入茶餐廳揀個靚位,邊嘆凍檸茶邊睇書,睇到柳五使詐出賣李沉舟一段,我即時O嘴,連剛剛擺入口嗰塊無沙嗲味嘅沙嗲牛肉,都差啲吐番出黎,心諗,唔係啩?

珍珠都無咁真,柳五,原名柳隨風,同李沉舟係出生入死好兄弟。佢衰喺朱順水手上,李沉舟為救佢不惜太耗真元,惡戰朱順水、唐破、唐碎、唐滅、唐絕、唐大、墨家七子十三人,幾經辛苦,終於憑翻天三十六‧奇最後一奇──浩劫之拳,大破唐大嘅魔道童子功同墨家七子首領墨攻嘅空守道。諗住可以順利救人,點知柳五忽然倒戈,暗器射破李沉舟鐵一般的胸膛,之後講出出賣兄弟原因,原來因為爭女,柳五畢生最愛,正正係李沉舟妻子趙師容。呢條橋扭得好急激,完全估佢唔到,不過睇過薄裝版《群俠傳》嘅老死透露,更更更估佢唔到嘅橋段陸續有來,仲話柳五此舉別有用心咁話喎,堅定流?又要等多兩個禮拜嘞。

完全版《群俠傳》卷十二,$48