動漫資訊, 潮玩新聞 — 16/03/2014 at 11:30 am

《大渡畫集》第二期 終於有漫畫睇

by

aaa

咪好囉,咁咪乖囉,咁先似番本公仔書吖嘛,《大渡畫集》第二期終於唔見咗「人物設定集」幾粒字,六個主筆六個故事統統以序章形式見街,實牙實齒有漫畫睇,咁先係路嘛。

讀後有感,一,對溫日良《新著中華英雄》有少少失望,司徒無量、金太保、醉癲、無敵全部有出場,但又唔係做番原著嘅角色,變成閒角,仲要加埋個唔知乜造型嘅滑鼠,玩諧音玩食字,究竟搞乜呢?暫抱觀望態度,希望之後扭橋扭得好啲喇。二,司徒劍僑《一零八》先出「神行太保」戴宗,透過佢撻黃金千兩,帶出「武林最強」武松與「人間無敵」林沖嘅驚天一戰,表達手法好大路,但穩陣,加上畫功超班,我最期待。三,徐大寶《亡魂之書》,全本《大渡畫集》都係打打打,整個鬼古當間場非常Nice,但編劇張君寶手字就好曳吓,行文多沙石,久唔久逗號之後又會無咗字而直接開行,好大機會係網上資料copy and paste。四,鄺彬強《自強不息》講殘障人士嘅正邪對壘,題材新穎,跛嘅聾嘅都可以打餐死,咁都畀佢諗得出,要畀Like。五,胡紹權《我是中國人李小龍》不過不失,講真李小龍故事太深入民心,加上地位已達神級,根本無人敢寫衰寫壞佢,理論上已經畫無可畫,姑且又睇睇胡紹權仲可以變得出乜嘢花臣。六,曹志豪《同伴》講黑社會,好彩無採納貓十字造型面相,如果唔係我會即刻罷睇。