fbpx
主頁, 動漫資訊, 潮玩新聞 — 09/07/2012 at 10:00 am

《火武耀揚》太保陣亡,天下齊聲一哭!

by

「你先天白痴定後天低能?」呢句經典對白,好快就再唔會喺《火武耀揚》出現,因為……嗚嗚嗚,因為太保應該喺下期往閻羅王報到嘞。

太保身授華興會荃灣水白紙扇,雖然好打,但喺邱瑞新筆下,佢不嬲都以英俊不凡嘅浪子造型出現,講嘢風趣鬼馬寸寸貢,但又不失大佬風範,最搞笑係身為浪子嘅佢居然會用情專一,上幾期同李香蘭做愛一幕,少少鹹多多趣,真係幾搞鬼。今次瑞新為咗去橋,加快將故事推去高潮,侷住整死太保,後巷廝殺一幕畫得好正,腹腔中刀流出心肝脾肺腎,非常壯懷激烈。唉,可惜吖,死喺飛禽、K哥同白虎呢啲二線角色手上,真係有啲唔抵。不過咁啦,舊嘅唔去,新嘅唔嚟,唔死吓啲重要角色,本書就會老化,希望大保呢鋪死得有價值啦。

太保,來生再見,一路好走啦。

第663期《火武耀揚》$15