fbpx

Parrot Zik X Philippe Starck 演奏級手機耳筒

by

 

Philippe Starck設計嘅凳就見得多,估唔到佢會踩過界,連無線手機耳筒都玩埋,Parrot Zik真係好靚仔,不過咁大抽嘢擺上頭,如果你個Look唔夠霸氣,我怕你會襯佢唔起,Anyway!7月底香港見街,如果你可以三十幾度天氣、戴住佢出街,都係一種霸氣!

 

Parrot今次推出首款無線音樂與電話耳機,就搵嚟殿堂級設計大師──Philippe Starck親自操刀, Zik採用咗最尖端的技術,包括高性能嘅主動式噪音控制、極富「空間感」的音樂表現、可實現體感運動的觸控式面板、頭部偵測傳感器、頜骨導傳感器、5個咪高峰同一個强大的數碼訊號處理器……

 

將音樂放喺你面前

首先講音效方面,耳機之所以咁大部,可能同佢內置數位訊號處理器(DSP)有關!廠方好標榜空間感表現,甚至形容為「Parrot演奏廳」!最大唔同嘅地方,係因為你所聽到嘅音樂,並唔係來自左耳或者右耳,而係「放置」喺你的面前,就好似置身演奏廳一樣!

 

聽歌聽電話加裝滅聲器

聽歌聽電話道理一樣,最怕街聲、人聲、車聲嘈到你!於是Parrot工程師就開發咗高性能嘅主動式消噪專利技術,最高可以消除25分貝噪音!令你就算行住街、搭住地鐵,都可以感受無與倫比嘅原音享受!

而且呢項滅聲器技術,仲延伸到電話通話之中;聽就故然無問題啦!更強係佢喺話音表現;因為耳筒內置咗一個「傳感器」喺左邊聽筒海綿墊位,佢可以探測同埋分析頜骨的震動,再同周圍嘅環境噪音進行對比。因此佢可以通過用家喺講話時嘅動作,將周邊嘅噪音同真正嘅話音,完全分離出嚟。

 

直感操控 正到唔信

苦茶另一樣好鍾意Zik嘅原因,係因為佢嘅操作非常直感;耳筒上面有一個觸控式面板(右側耳機整個外殼表面),操作感覺就好似一部智能手機一樣,你用手指尖「垂直滑動」,就係控制音量,「水平滑動」佢又識得前、後跳一個音樂曲目;有電話接入嚟時,你亦唔需要攞部手機出嚟,只要輕輕叩一下右側耳機,佢就會馬上接聽,長按2秒就變成「拒絕接聽來電」!

內置AMP又行電,雖則操作時間都有成4粒鐘,不過唔慳啲使,吓吓叉電都唔係辦法;為咗幫一眾大頭蝦慳電,機身特別內置「頭部移動感應裝置」,只要你挪下耳筒,掛在頸上,耳筒就會識得自己暫停,戴返上頭,音樂又會再次響起,咁以後唔怕唔記得熄機,扯乾嚿電啦!

iOS / Android兼玩

Parrot 將會為用家,提供iOS及Android平台嘅免費應用程式,所以兩邊用家都一樣討好;至於連線方面,基本簡單藍芽連線無乜難度,你喜歡「化繁為簡」嘅,你仲可以用NFC (近距離無線通訊) 技術,通過左側耳機上的標簽來進行簡單的 Bluetooth 配對。

到最後、最壞打算,如果個耳筒無電點算先?簡單!只要你用3.5mm接線,將佢同手機駁上,就可以當佢普通手機有線耳筒咁用,雖則可以聽電話又聽歌,但甚麼抑噪、Amp功能、直感操作就會無晒!所以都係勤啲叉電啦,無電、成件事咪唔型囉!仲用佢嚟把鬼咩!

預計7月底上市。連卡佛、K11 Design Store、HMV、香港唱片、Apple Retail Store、Nuance Watson、Aura Audio 及其它指定零售店公開發售,開價$3,399。

 

查詢:http://www.parrot.com