fbpx
主頁, 動漫資訊, 潮玩新聞 — 30/06/2012 at 2:00 pm

《蒼天霸皇》專欄一流,再讚!

by

利益申報,我絕對無收黃玉郎錢,想反黃玉郎每個禮拜都不知賺我幾多錢,連續兩段News都讚《蒼天霸皇》專欄,只因為確實抵讚,睇漫畫其實為開心,睇得開心就要讚,紅黑紅紅黑──就係咁簡單。
專欄「天子絕密檔案」好頂癮,頂癮在講番每期封面點樣經過多次修改先正式見街,就以第四期為例,封面原圖係呂凰胸壓加腿磨鐵木真,背景係個蜘蛛網,蜘蛛網上面有隻黑寡婦,原來最初人物設定嗰陣,呂凰唔叫呂凰,而係叫黑寡婦,原圖呂凰打開領口大露天賦本錢,畫成八字奶一對,經黃玉郎指點,見街封面胸脯即時飽滿挺拔得多。
又如第十三期,封面係一個典床典蓆嘅姣爆艾美黛,咬晒唇慾火焚身,原圖畫到佢大腿廝磨、心口春光乍洩;經審訂,見街封面明顯檢點晒,用嘟嘴代替咬唇,表情即時無咁姣,領口拉番埋啲,乳溝即時失蹤,性感而不令人反感就係呢隻嘞。從中可以發現,原來少少改動,出嚟嘅效果已經截然不同,呢個專欄,真係值得追睇。

專欄「天子絕密檔案」,行文用字異常抵死。

 

原圖同見街封面,原來經過咁多修改。

 

第十四期《蒼天霸皇》$15