fbpx
主頁, 動漫資訊, 潮玩新聞 — 30/06/2012 at 1:59 pm

《蒼天霸皇》錯得開心過癮,讚!

by

環顧掛黃玉郎牌頭o既眾多作品,暫時好明顯以《蒼天霸皇》投放o既資源最多,大家有眼睇,鐵木真、札木合o既面相造型,比《石黑龍傳》o既石黑龍同白仇靚仔得多,又或者用《蒼天霸皇》o既艾美黛、邵小小同《石黑龍傳》o既白天娜、九紋龍再比一比,擺明係蚊髀同牛髀,前兩者五官明顯畫得標緻N倍,連身材都畫得婀娜多姿得多。
不過投放資源多,唔代表唔會出錯,《蒼天霸皇》有個專欄「天子格格竇」,專講番上期內文錯處,就以第十三期為例,就講凰城城主呂凰頭一格著絲襪,後一格變o左無著,又話艾美黛條頸鏈吊墜時黃時橙,連臂環花紋都時有時無。數來數去,無非都係分錯色、植錯字、畫漏衣飾花紋等細眉細眼小錯處,編者唔講,作為讀者o既我都未必留意得到。Overall講,呢個專欄其實幾過癮,如無意外係每周鋤書會之作,將會議紀錄變成專欄,配番幾幅舊相,加同黃玉郎一問一答,成篇文章寫得風趣抵死,可讀性好高。不過讚還讚,諗深一層其實都幾吊詭,期期都有呢個專欄,咪意味住期期都有錯?斷估唔會為出一個專欄而專登出錯卦?Anyway,諗到呢條橋位人兄確係一絕。

第十三期《蒼天霸皇》$15

 

專欄「天子格格竇」,可讀性好高。

 

圖文並茂指出艾美黛吊墜顏色出錯。