主頁, 動漫資訊, 潮玩新聞 — 29/06/2012 at 2:00 pm

《群俠傳二》死得人多,夠薑!

by

好驚呀!死得人多呀!講緊嘅係《群俠傳二》,居然將啲主角逐一整死,仲要件件都死得壯懷激烈,死吓一件死吓又一件,怕唔怕無晒主角擔大旗呀?
記得創號刊一出,六分半堂件唔知第幾堂主雷嬌已經率先往閻羅王報到,之後到殺手之王唐斬死無全屍,兩人加埋都唔畫唔夠十頁八頁,三兩下手勢就俾天下第七KO。睇到第五期,連六分半堂總舵主雷損都釘埋,我個心怯一怯,心諗,唔會仲有人死呀?

話口未完,去到第七期,元十三限自視天下無敵嘅仇極掌同恨極拳,敵唔過金風細雨樓樓主蘇夢枕嘅抱憾禪功,又死埋!須知主角係一本書嘅靈魂,好多港漫迷都因為追主角而追書,強如牛佬《古惑仔》寫福田一役,都唔敢整死陳浩南同大飛,而喺溫瑞安原著小說裡面,元十三限係自在門老三,同天衣居士、諸葛小花同Grade,親手調教出六合青龍等十一個徒弟,連天下第七都係佢弟子,佢仲同諸葛小花爭過女添,地位舉足輕重,家陣司徒劍橋將佢處死,都咪話唔夠薑,不得不寫個服字!或者溫瑞安小說人物眾多啦,死極都仲有,即管又睇吓下一個死嘅係邊個?

元十三限一招「恨拳仇掌‧詭變無常」,睇個勢好勁,點知......

 

點知蘇夢枕一出抱憾禪功,元十三限成個人散晒。第七期《群俠傳二》$15