fbpx
主頁, 動漫資訊, 潮玩新聞 — 29/06/2012 at 12:00 pm

《四大名捕》擒日見街,霸氣縱橫!

by

創號刊《四大名捕》$15

好開心呀,好開心見到「馮志明」三個字再次喺香港畫壇出現,新作《四大名捕》擒日見街,我第一時間買嚟睇,可惜買唔到加送十六頁人物設定沙筆畫集嘅特別大版,只買到十五大元嘅普通版。

一揭,正吖,老馮功力依舊Keep到水準,雙封面用色簡單利落,輪椅襯紫髮無情、獅子襯藍髮鐵手、惡豹襯紅髮追命、餓狼襯綠髮冷血,造型衣飾好切合四大名捕各自嘅出身背景同武功路數。老死睇過之前司徒劍橋畫嘅《四大名捕》,一比較,就話老馮手畫怪怪哋:「老馮其實畫得幾靚,但唔知點解,硬係覺得唔多順眼。」唔順眼?我唔覺喎,呢個好明顯係珠玉在前啦,究其實,司徒劍橋走華麗刁鑽路線,每一格都精雕細琢;老馮則大開大合,畫面簡單少線條,每一格都乾淨清脆,一睇就知道焦點所在。唔係牆頭草,我真心認為兩人各有千秋,老馮畫得出濃濃江湖味,尤其追命出腳嗰一幅全頁黑白稿,簡直霸氣縱橫。故事方面,創刊號先鋪故事主線,大奸角絕滅王楚相玉想割地稱王,差啲就可以KO當今大宋皇帝,可惜為忠肝義膽嘅諸葛先生出手阻止,囚禁於鐵血大牢。同時,透過兩單案件同楚相玉逃獄一事,先後帶追命、冷血同鐵手出場,鋪陳方法係好大路,但勝在穩陣,忠奸二分簡單易明唔使估估吓,睇得人好舒服。
訪問過老馮,知道佢對港漫仲有一腔攝氏達九億九千九百九十九萬九千九百九十九度嘅熱血,屬義氣仔女,為人有嗰句講嗰句,應該唔介意我作出少少善意的批評。少少意見,讀者如我都係貪心嘅,可唔可以畫得細格啲呢?太快睇完唔夠喉呀!另外,對白用字可唔可唔好又紅又藍又綠又紫呢?用完色再包邊,有少少睇到眼花。Anyway,整體嚟講,我畀呢本書九十五分,老馮請繼續努力,加油呀,支持你呀。

呢幅追命出腿黑白稿,我最Like。